हास्य अभिनेता जितु नेपाल मुख्य भूमिकामा प्रस्तुत भएको चलचित्र ‘ह्यारीकी प्यारी’ यहि माघको २० गतेदेखि प्रदर्शनमा आउँदैछ । 

यसअघि उनले थुप्रै चलचित्रमा अभिनय गरे पनि केन्द्रीय भूमिका निर्वाह गरेको यो नै पहिलो चलचित्र हो । 

डा. भोला रिजालको निर्माण रहेको चलचित्रमा जितुको को–एक्टरका रुपमा अभिनेत्री साम्राज्ञी राज्यलक्ष्मी शाह छिन् । डा. कपिल रिजालले यस चलचित्रलाई निर्देशन गरेका हुन् । 

चलचित्रको प्रदर्शन मिति नजिकिँदै जाँदा अभिनेता जितु नेपालको मनमा यतिबेला केही कुराहरू खेलिरहेका छन् । 

लिड भूमिकामा प्रस्तुत भएको पहिलो चलचित्र भएका कारण यसले आफूलाई स्थापित गर्छ/गर्दैन् ? भन्ने उनको मनमा खेलिरहेको पहिलो कुरा हो । 

त्यस्तै, चलचित्रमा उनले हास्य कलाकारबाट अलिकति पछि हटेर इमोशनल/भावनात्मक भूमिका निर्वाह गरेका छन् । त्यसलाई दर्शकहरुले कसरी लिन्छन् भन्ने कुरा पनि आफ्नो मनमा खेलिरहेको जितु सुनाउँछन् ।

चलचित्रको व्यापारलाई लिएर पनि उनको मनमा कुरा खेलिरहेको छ । 

लोकान्तरसँग कुरा गर्दै जितुले भने, – ‘अर्को मनमा खेलिरहेको कुरा व्यापारको पाटो हो । यसले व्यापार पनि त गर्नुपर्यो। चलचित्र पनि चल्नुपर्यो । निर्माता सुरक्षित हुनुपर्यो ।’ 

मनमा खेलिरहेका कुरामध्ये सबैभन्दा राम्रो चलचित्रको व्यापारमा होस् भन्नेमा आफू रहेको उनले बताए । 

रोमान्टिक कमेडी जनरामा निर्माण भएको ‘ह्यारीकी प्यारी’मा विजय बराल, लक्ष्मी गिरी, सुवास गजुरेल, रञ्जना भट्टराई लगायतको अभिनय छ । 

राष्ट्रपतिले जितुसँग भनिन्, – चलचित्रबारे चर्चा सुनेकी थिएँ ! 

‘ह्यारीकी प्यारी’ चलचित्रले दर्शकमाझ राम्रो हाइप बनाइरहेको छ । राष्ट्रपति विद्यादेवी भण्डारीले समेत चलचित्रबारे चर्चा सुनेको कुरा आफूलाई बताएको जितुले बताए । गत सोमबार राष्ट्रपति विद्यादेवी भण्डारी र चलचित्रकर्मीबीच अन्तक्रिया कार्यक्रम थियो । उक्त कार्यक्रममा भएको भेटमा राष्ट्रपतिले जितुसँग हालखबर सोधेकी थिइन् । 

‘मैले ह्यारीकी प्यारी चलचित्र गरेको छु भनेको थिए’ जितुले लोकान्तरसँग भने, ‘चर्चा सुनेकी थिएँ । समाचारहरू पढेकी थिएँ भन्दै हुनुहुन्थ्यो । खुशी लाग्यो ।’ 

दर्शक एवं कलाकारहरूबाट समेत सकारात्मक प्रतिक्रिया आएको हुनाले आफू एकदमै उत्साहित रहेको समेत जितुले सुनाए ।