चलचित्र विकास बोर्डले दुबईमा आयोजना गर्न लागेको अन्तराष्ट्रिय फिल्म फेस्टिभलमा ‘महापुरुष’लाई सहभागी नगराउन निर्माण टिमले अनुरोध गरेको छ । 

साथै, निर्माण टिमले आफूहरूसँग अनुमति नलिई ‘महापुरुष’ देखाउने भन्दै प्रचार गरिएकोमा पनि आपत्ति जनाएको छ । 

फिल्म निर्माण कम्पनी षट्कोण आर्टले आफ्नो फेसबुकमा लेखेको छ – चलचित्र विकास बोर्डले ३० लाख खर्च गरेर विवादास्पद कम्पनी सूर्य कर्पोरेसनसँग मिलेर नेपाली फिल्म र पर्यटनलाई विश्व सामु पुर्याउने नाराका साथ दुबईमा गर्न लागेको गर्न लागेको नेपाली सिनेमा फेस्ट २०२३ मा हाम्रो फिल्म ‘महापुरुष’ हामीसँग अनुमति नलिइकन उक्त कार्यक्रममा समावेश गरेकोमा हाम्रो ध्यानाकर्षण भएको छ । हाम्रो नेपाली चलचित्र लाई विश्व बजारमा पुर्याउने विकास बोर्डको चाहना स्वागत छ तर यी र यस्ता नेपालीहरू माझ हुने घुमघाम र नाचगान कार्यक्रमले नेपाली फिल्मलाई कसरी सहयोग विश्व बजारमा लैजान्छ होला ? यता खर्च गर्ने ३० लाख पैसाले बरु त्यै मिडल इस्टमा व्यावसायिक प्रदर्शन हुने नेपाली फिल्महरुको सेन्सरमा ट्रान्सलेसनमा सहयोग गरे केही राहत होला । साथै विवादमा आएको कम्पनीसँग सहकार्य गर्न बोर्डलाई के कुराले बाध्य बनायो होला ? यी र यस्तै प्रश्न र सुझाव सहित हाम्रो फिल्म उक्त कार्यक्रममा सहभागी नगराउनु हुन अनुरोध गर्दछौ ।’ 

चलचित्र विकास बोर्डले विवादास्पद कम्पनी सूर्य कर्पोरेसनलाई इभेन्टको जिम्मा दिँदै दुबईमा फेस्टिभल गर्ने तयारी गरिरहेको छ ।

फेब्रुअरी १२-१४ सम्म हुने फिल्म फेस्टिभलमा ‘कबड्डी कबड्डी ४’, ‘ऐना झ्यालको पुतली’, ‘महापुरुष’आदी फिल्म पनि देखाउने कार्यतालिका रहेको छ ।