प्यूठानबाट निर्वाचित प्रतिनिधिसभा सदस्य सूर्य थापाले पहिलो महिनाको पारिश्रमिक प्यूठानको एक विद्यालयमा अक्षयकोष स्थापनाका लागि दिने घोषणा गरेका छन् । मल्लरानी गाउँपालिका २ चुँजामा रहेको अमर माध्यमिक विद्यालयमा अक्षयकोष स्थापनाका लागि सो पारिश्रमिक दिने सांसद थापाले घोषणा गरेका हुन् ।

विद्यालयको स्वर्ण महोत्सव कार्यक्रममा सहभागी भएका सांसद थापाले सम्बोधनका क्रममा सो सहयोग गर्ने घोषणा गरेका हुन् । थापाले पार्टीलाई बुझाउने लेबी र कर कट्टीपछि बचेको पारिश्रमिक विद्यालयलाई उपलव्ध गराउने उनले बताए । विद्यालयले उक्त रकमबाट आवश्यकता अनुसारको अक्षयकोष स्थापना गरेर सदुपयोग गर्न थापाले आग्रह गरे ।

एकमात्र निर्वाचन क्षेत्र रहेको प्यूठानमा थापा पहिलो पटक प्रतिनिधिसभा सदस्यमा निर्वाचित भएका थिए । उनी नेकपा (एमाले) का पोलिटब्यूरो सदस्य र प्यूठान जिल्ला इन्चार्ज समेत हुन् । सांसद् निर्वाचित भएसँगै जिल्लामा हुने विभिन्न सार्वजनिक महत्वका कार्यक्रममा उनको सहभागिता रहनेगरेको छ ।