जनता समाजवादी पार्टी (जसपा) नेपाल को केन्द्रीय कार्यकारिणी समिति बैठक आज सोमबार पनि बस्दैछ । बैठक बिहान ११ बजेबाट पार्टी केन्द्रीय कार्यालय बालकुमारीमा शुरु हुने सो दलका नेताले बताएका छन् । आजको बैठकमा राष्ट्रपति र उपराष्ट्रपतिलगायत विषयमा छलफल हुने सो दलका नेता मनिस सुमनले बताए ।  

आइतबार बसेको बैठकमा पनि राष्ट्रपति र उपराष्ट्रपति विषयमा छलफल भएको थियो । नेता सुमनका अनुसार जसपा राष्ट्रिय सहमतिमा नै राष्ट्रपति चयनको पक्षमा रहेको छ । आजको बैठकमा उपराष्ट्रपति जसपाले लिनुपर्ने विषयमा पनि छलफल हुने उनको भनाइ छ । चुनावमा पार्टीभित्र भएको अन्तर्घातको विषयमा भइरहेको छानबिन प्रतिवेदन चाँडै पेस गर्नुपर्ने विषयमा नेताहरुले कुरा उठाएपछि आज पनि त्यस विषयमा छलफल जारी रहने उनले बताए ।