ताइवानले अमेरिकासँगको सैन्य सम्बन्धलाई थप बढाउन खोजको त्यहाँकी राष्ट्रपति त्साई इङ–वनले बताएकी छन् । 

ताइवान भ्रमणमा आएका अमेरिकी सांसदहरूको समूहसँग कुरा गर्दै त्साईले निरंकुशताको विस्तारको सामना गर्न अमेरिका तथा अन्य मित्रराष्ट्रहरूसग सम्बन्ध विस्तारमा जोड दिने बताएकी हुन् । 

अमेरिकाका दुवै दलका सांसदहरू आइतवार ताइवान पुगेका हुन् । चीनको जासूसी भनिएको बलून अमेरिकी आकाशबाट खसाइएपछि दुई देशबीच बढेको तनावकै क्रममा अमेरिकी सांसदहरू ताइवान पुगेका हुन् । 

अन्य धेरै मुलुक जस्तै अमेरिकाले पनि ताइवानसँग औपचारिक कूटनीतिक सम्बन्ध राखेको छैन । तर ताइवानको समर्थन गर्ने अनि उसलाई सबभन्दा बढी हतियार उपलब्ध गराउने मुलुक अमेरिका नै हो ।

अमेरिकाले ताइवानमा सैन्य अखडा नराखेको भए पनि उनीहरूबीचको सैन्य सम्बन्ध बढ्दै गएको छ । चीनले ताइवानमाथिको दबाब बढाउँदै जाँदा अमेरिका र ताइवानले सम्बन्ध घनीभूत बनाएका हुन् ।