नयाँ दिल्ली ८ भदौ — संविधानमा असन्तुष्ट समूदायका माग सम्वोधन गरेर नेपाल अगाडि बढ्नुपर्ने यसअघिको अडान भारतले दोहोर्याको छ । यसले नै नेपालमा राजनीतिक स्थीरता, सद्भाव र आर्थिक समृद्धि हासिल हुने भारतको भनाइ रहेको छ ।
बिहीवार साँझ भारतीय विदेश मन्त्रालयमा आयोजित पत्रकार सम्मेलनमा भारतीय विदेश सचिव एस जयशंकरले मधेश केन्द्रित दलहरुको नामै नलिइ नेपालले असन्तुष्ट सबै तप्काका माग सम्वोधन गर्नुपर्ने बताए ।
‘समाजका सबै तप्कालाई सँगै लिएर हिँड्ने प्रयासलाई नेपालले जारी राख्नु पर्छ’ उनले भने, ‘यसले नै नेपालमा राजनीतिक स्थिरता कायम गर्छ ।’ संविधान संशोधन कहिले र कसरी गर्ने भन्ने बिषय नेपालको आन्तरिक मामिला भएको उनले बताए ।
संविधान संशोधनको प्रयास असफल भएपनि मधेस केन्द्रित दलका माग सम्वोधन गर्नुपर्ने अडान कायमै राखेको भारतले संकेत गरको छ ।
प्रधानमन्त्री नरेन्द्र मोदीसँगको भेटमा नेपालका प्रधामनन्त्री शेरबहादुर देउवाले असन्तुष्ट समूहका माग सम्वोधन गर्न संविधान संशोधनलाई पुनः अगाडी बढाउने बताएका थिए ।
खुल्ला सीमानाको दूरुपयोग नहोस भन्ने बिषयमा प्रधामनन्त्री देउवासँग छलफल भएको उनले बताए । खुल्ला सीमानाका कारण आउन सक्ने सुरक्षा चुनौती सामना थप सजगता अपनाउनु पर्ने कुराकानी भएको उनने बताए ।
दोक्लाम र कालापानीबारे सोधिएको प्रश्नमा जवाफ दिएनन्पत्रकार सम्मेलनमा भारतीय पत्रकारहरुले दोक्लामको भारत–चीन सीमामा भइरहेको विबादबारे नेपालसँग कुनै कुनै कुरा भयो कि भनेर प्रश्न गरेका थिए ।
तर विदेश सचिव जयशंकरले दोक्लम विबादबारे कुरै नभएको बताए । अन्तिम प्रश्न कालापानी विबादको बिषयमा सोधिएको थियो । त्यस बिषयमा भने शंकरले केही बोलेनन् ।
