राष्ट्रपति उम्मेदवारमा सहमति जुटाउन प्रधानमन्त्री निवास बालुवाटारमा बसेको चार दलको बैठक लम्बिएको छ ।

सरकारको नेतृत्वकर्ता दल नेकपा (माओवादी केन्द्र) तथा  सरकारबाहिर रहेका नेपाली कांग्रेस, जसपा र एकीकृत समाजवादीको बैठक बिहान करीब ९ बजेदेखि बसिरहेको हो । 

यो समाचार तयार पार्दा (मध्याह्न पौने १२ बजे)सम्म बैठक जारी छ ।

बैठकमा प्रधानमन्त्री पुष्पकमल दाहाल ‘प्रचण्ड’, कांग्रेस सभापति एवं पूर्वप्रधानमन्त्री शेरबहादुर देउवा, एकीकृत समाजवादीका अध्यक्ष एवं पूर्व प्रधानमन्त्री माधवकुमार नेपाल तथा जसपा अध्यक्ष उपेन्द्र यादवलगायत सहभागी छन् ।

कांग्रेसहितको बैठकपछि माओवादी अध्यक्ष समेत रहेका प्रधानमन्त्री प्रचण्डले नेकपा एमालेका अध्यक्ष केपी ओलीसँग छलफल गर्दैछन् । 

फागुन २५ गते हुने राष्ट्रपति निर्वाचनका लागि भोलि शनिवार उम्मेदवार मनोनयनको कार्यतालिका छ । शुक्रवारसम्म उम्मेदवारबारे सहमति जुटेको छैन । 

पुस १० गते भएको सहमतिअनुसार राष्ट्रपति आफूले पाउनु पर्ने एमालेको दाबी रहँदै आएको छ ।

नेपाली कांग्रेस भने राष्ट्रपतिमा माओवादीले आफूहरूलाई समर्थन गर्ने विश्वासमा छ ।