११ साउन २०८३, सोमबार
क्रिकेटर सन्दीप लामिछाने यूएई जान पाउने कि नपाउने भन्ने टुंगो आइतवार मात्र लाग्ने भएको छ ।
सर्वोच्च अदालतका न्यायाधीश ईश्वर खतिवडाको इजलासले सन्दीपको निवेदनलाई यसै प्रकरणसम्बन्धी अर्को मुद्दासँगै राखेर आइतवार पेश गर्न आदेश दिएको हो ।
सन्दीपलाई धरौटीमा छाड्ने उच्च अदालतको आदेशविरुद्ध सरकारले सर्वोच्चमा पुनरावेदन गरेको छ । उक्त पुनरावेदन समेत शुक्रवार पेशीमा चढे पनि सुनुवाइ हुन सकेन ।
'दुवै निवेदनलाई आइतवार एक साथ राखेर सुनुवाइ गर्ने आदेश भएको छ,' सन्दीपका वकिल सरोजकृष्ण घिमिरेले लोकान्तरलाई जानकारी दिए ।
न्यायाधीश खतिवडाले यस विषयको टुंगो लगाउन ढिलाइ गर्दा निवेदनको मर्म नै मर्ने भएकाले अग्राधिकार दिएर सुनुवाइ गर्न आदेश दिएका छन् ।
'आगामी हप्ता नै खेलिने अन्तर्राष्ट्रिय क्रिकेट खेलसँग सम्बन्धित विषय देखिएको र उल्लिखित निवेदनउपरको सुनुवाइमा ढिलाइ हुन गएमा निवेदनको मूल प्रयोजन नै समाप्त हुन जाने समेत देखियो । तसर्थ प्रस्तुत विषयमा तत्काल सुनुवाइ गर्न आवश्यक देखिएकाले प्रस्तुत निवेदनलाई २०७९-RE-0136 को प्रतिवेदनसँग लगाउमा साथै राखी महान्यायाधिवक्ताको कार्यालयलाई पेशीको जनाउ दिई सुनुवाइका लागि अग्राधिकार समेत प्रदान गरी २०७९ फागुन १४ गते संयुक्त इजलासमा पेश गर्नू,' सर्वोच्चको आदेशमा भनिएको छ ।
नाबालिग बलात्कारको आरोपमा सन्दीपमाथि जिल्ला अदालत काठमाडौंमा मुद्दा विचाराधीन छ । जिल्ला अदालतले सन्दीपलाई पूर्पक्षका लागि थुनामा पठाए पनि उच्च अदालतले त्यसलाई उल्ट्याउँदै धरौटीमा छाडेको थियो ।
धरौटीमा छाड्ने क्रममा सन्दीपलाई विदेश जान रोक लगाइएको छ । सोहीविरुद्ध सन्दीप निवेदन लिएर सर्वोच्च पुगेका हुन् ।
आगामी साता यूएईमा हुने क्रिकेट प्रतियोगिता खेल्न पाउनुपर्ने सन्दीपको माग छ ।
हेर्नुहोस् आदेश :
