नाबालिग बलात्कारको अभियोग लागेका नेपाली क्रिकेटका पूर्व कप्तान सन्दीप लामिछानेको सुनवाइ आज हुँदैछ । हिजो आइतबार न्यायाधीश सपना प्रधान मल्ल र कुमार चुडालको बन्द इजलासमा भएको सुनुवाइ नसकिएपछि आज पुनः सुनुवाई हुन लागको हो ।

नाबालिग बलात्कार मुद्दामा उच्च अदालत, पाटनले धरौटीमा छाडेपछि सन्दीपलाई थुनामा राख्न माग गर्दै महान्यायाधिवक्ता कार्यालयले सर्वोच्चमा रिट दायर गरेको थियो । आफूलाई विदेश जान दिनुपर्ने माग गर्दै सर्वोच्च अदालतमा सन्दीपले पनि निवेदन दिएका छन् । 

बलात्कार गरेको आरोपपछि लामिछानेले गत असोज २० गते प्रहरीसमक्ष आत्मसमर्पण गरेका थिए । उच्च अदालत पाटनको आदेशसँगै गत पुस २९ गते २० लाख धरौटीसहित उनी रिहा भएका थिए । लामिछाने धरौटीमा छुटे पनि उनलाई खेल खेल्न विदेश जान अदालतले रोक लगाएको थियो । सो आदेशविरुद्ध क्रिकेटर लामिछाने सर्वोच्च गएका थिए । 

सरकार र लामिछानेको दुवै मुद्दामा गत शुक्रवारदेखि भएको सुनवाइ सकिएको छैन । सो मुद्दाको सुनुवाई आज सोमबारका लागि पुनः पेशी तोकिएको छ । सर्वोच्च अदालतको सुनुवाई पछि क्रिकेटर लामिछाने विदेशमा खेल खेल्न जान पाउने या नपाउने विषयमा टुंगो लाग्नेछ । उनलाई स्वोदशमा भने खल खेल्ने अनुमति दिइसकेको छ ।