बाल यौन शोषण कार्यमा संलग्न रहेको अभियोगमा एक चिनियाँ नागरिक पक्राउ परेका छन् । ४९ वर्षीय याङ लि मिङलाई प्रहरीले पक्राउ गरेको जनाएको छ । 

ललितपुर महानगरपालिका–२२ वुंगमतीस्थित कोका न्यू प्युरी एण्ड म्याट्रेस कम्पनी सञ्चालन गर्दैआएका उनले फेसबुकमार्फत नाबालिकालाई साथी बनाई काठमाडौं बोलाएर बिभिन्न मनोरञ्जनात्मक गतिबिधिहरुमा संलग्न गराएको उनलाई आरोप थियो । आर्थिक प्रलोभन देखाई यौन शोषण गर्ने गरेको भन्ने विशेष सूचनाको आधारमा केन्द्रीय अनुसन्धान व्यूरो महाराजगञ्जबाट खटिएको प्रहरीले उनलाई ललितपुर महानगरपालिका–२२ वुंगमतीबाट पक्राउ गरेको छ । 

उनले १४ देखि १७ वर्षका ६ जना नाबालिकहरुमध्ये २ जनालाई बुङमतीस्थित आफ्नै अपार्टमेन्टमा लगि यौन शोषण गरिसकेको तथा अन्य ४ जना बालिकाहरुलाई ठमेलस्थित होटलमा ललाईफकाई राखिएको अवस्थामा प्रहरीले ती बालिकाहरूको उद्वार गरेको जनाएको छ । 

उनीउपर जबरजस्ती करणी शीर्षक मुद्दामा जिल्ला अदालतबाट तीन दिनको म्याद अनुमति लिई प्रहरीबाट आवश्यक अनुसन्धान भइरहेको जनाएको छ ।