०६ असार २०८३, शनिबार
राजकुमार रावको मुख्य भूमिका रहेको फिल्म भीडको ट्रेलर सार्वजनिक गरिएको छ ।
अनुभव सिन्हाको निर्देशनमा बनेको फिल्मको ट्रेलर सिनेमाघरमा तू झूटी मैं मक्कारसँगै देखाइएको थियो भने इन्टरनेटमा चाहिँ शुक्रवार सार्वजनिक गरिएको हो ।
कोभिड महामारीको समयमा देशभित्रै सीमा कोरेर बन्देज लगाइएको विषयलाई फिल्ममा उठाइएको छ ।
महामारी रोक्न लगाइएको लकडाउनका कारण निम्न तथा निम्नमध्यमवर्गीय परिवारले काम गर्न नपाएको अनि घर जान पनि नपाएको पीडा फिल्मले देखाएको छ । सडकमा भौंतारिएका मानिसलाई अमानवीय व्यवहार गरिएको कटु यथार्थ पनि फिल्मले प्रस्तुत गरेको छ ।
ट्रेलरमा श्यामश्वेत दृश्य देखाइएको छ जसले कथामा सौन्दर्य र सत्य थपेको छ ।
फिल्ममा राजकुमारका अलावा भूमि पेडनेकर र दिया मिर्जाको पनि भूमिका छ ।
