०६ असार २०८३, शनिबार
प्रधानमन्त्री पुष्पकमल दाहाल प्रचण्डले परिवर्तनलाई उल्ट्याउने कसरत भइरहेकाले सबै सचेत हुन आवश्यक रहेको बताएका छन् ।
एकीकृत अखिल नेपाल शिक्षक संगठन केन्द्रीय समितिको छैटौं राष्ट्रिय महाविधेशन उद्घाटन गर्दै उनले एकथरी मानिसहरू गणतन्त्र, समावेशी समानुपातिक मान्यता तथा देशका सबै उत्पीडित वर्ग र समुदायले पाएको अधिकारलाई खोस्न उद्धत रहेको दाबी गरेका हुन् ।
उनले राष्ट्र र जनताप्रति इमान्दार भइरहेसम्म दुनियाँका कुनै शक्तिले पनि आफूहरूलाई पराजित गर्न नसक्ने बताए । प्रधानमन्त्री प्रचण्डले विस्तृत शान्ति सम्झौता र त्यसका हस्ताक्षरकर्ता वा नेतृत्वकर्तामाथि कसैले नकारात्मक सोच राखेर नकारात्मक क्रियाकलाप गरे त्यो सफल नहुने दाबी गरे ।
आफूविरुद्ध मुद्दा दर्ता हुँदा तरंग पैदा भए पनि त्यसले माओवादी शक्तिहरूलाई एकजुट हुन मद्दत पुगेको बताए ।
‘विस्तृत शान्ति सम्झौतामाथि, अध्यक्ष र प्रधानमन्त्रीमाथि केही हुन लागेको हो कि भनेर देशभर ठूलो तरंग पैदा भयो । यो हामीलाई सहयोग गर्ने कुरा नै भइरहेको छ भन्ने थियो । विभाजित माओवादीलाई एक ठाउँमा आऊ, छिटोभन्दा छिटो ऐन अघि बढाऊ भन्ने बुझें । तत्काल मन्त्रिपरिषद् बोलाएर संसद्मा दर्ता गराएँ । अदालतको फैसला पनि शान्ति सम्झौताभन्दा बाहिर गएन, त्यसको पक्षमा नै आयो । हामी चिन्तित हुन पर्दैन, तर शतर्क हुनुपर्छ ।’
प्रधानमन्त्री प्रचण्डले संघीय शिक्षा ऐन पनि यही सदनमा प्रस्तुत गरी चाँडै पारित गर्ने प्रक्रियामा रहेको बताए । उनले मन्त्रिपरिषद् बैठकबाट जनयुद्ध, जनआन्दोलन, मधेश आन्दोलनलगायत सबै आन्दोलनका शहीदहरूलाई राष्ट्रिय शहीद घोषणा गरेको र उनीहरूको नाम राजपत्रमा प्रकाशित गर्ने निर्णय गरिएको समेत उल्लेख गरे ।
