आईसिसी विश्वकप लिग २ अन्तर्गत नेपालले पपुवा न्युगिनीलाई शानदार ९ विकेटले पराजित गर्दा धेरै रेकर्ड र संयोग जोडिएका छन् । नेपाली बलरले उत्कृष्ट प्रदर्शन गरेपछि पीएनजी ३१.६ ओभरमै ९५ रनमा अलआउट भएको थियो ।

आफ्नो जवाफी पारी शुरूवात गरेको नेपालले आक्रामक ब्याटिङको नमूना देखायो । 

नेपालले ७.४ ओभरमा १०० रन बनाउँदै लक्ष्य पूरा गर्यो । 

यस क्रममा ओपनर आशिफ शेखले २१ बलमा नटआउट ५३ रन बनाए । कुशल भुर्तेलले १४ बलमा ३३ रन बनाए । १३ बलमा १२ रन बनाएर कुशल मल्ल पनि नटआउट रहे । 

सामान्यतया: एक बलमा बढीमा ६ रन बन्छ । तर खेलको दोस्रो ओभरको अन्तिम १ बलमा नेपालले १६ रन बनायो ।  

काबुवा मोरेआले शुरूवाती ५ बलमा ४ चौका र २ रन गरी १० रन दिएका थिए । तर १.६ ओभरको अन्तिम बलमा १६ रन बटुल्न कुशल भुर्तेल सफल भए । 

अन्तिम बल फ्रन्ट फुट क्रसका कारण नोबल हुँदा चौकासहित ५ रन आयो । लगत्तैकाे बलमा पनि कुशलले कम्मरमाथि बललाई चौका प्रहार गरे । त्यो पनि नोबल हुँदा अतिरिक्त १ सहित ५ रन आयो । नाे बलमा भुर्तेलले ६ रन प्रहार गरे । यसरी अन्तिम १ बलमा भुर्तेलकाे ब्याटबाट नेपालकाे १६ रन निस्किएकाे हाे । 

एक ओभरमात्रै बलिङ गरेका काबुवाले २५ रन खर्चिन पुगे ।