एकै दिनबाट प्रदर्शनमा आएकामध्ये अनमोल केसी स्टारर फिल्म ‘छड्के २’ केही दिनमै हलबाट उत्रिँदा दीपकराज गिरी र दीपाश्री निरौलाको फिल्म ‘छक्का पञ्जा ४’ले आक्रामक व्यापार गरिरहेको छ ।

तेस्रो सातामा पनि फिल्मको कलेक्सन राम्रो देखिएको छ । यद्यपि, यो फिल्मले दर्शकबाट सकारात्मक प्रतिक्रिया पाए पनि समीक्षकबाट भने सकारात्मक प्रतिक्रिया पाउन सकेको छैन ।

यसैबीच, अभिनेता दीपकराज गिरीले समीक्षकले फिल्म मन पराए भने आफूलाई डर लाग्ने प्रतिक्रिया दिएका छन् । शनिवार सम्पन्न चलचित्र कलाकार संघको निर्वाचनमा सञ्चारकर्मीसँग कुरा गर्दै लेखक एवं निर्मातासमेत रहेका दीपकले उक्त कुरा बताएका हुन् । 

‘समीक्षकले फिल्म मन पराइदिए भने मलाई डर लाग्छ  । दर्शकले मन पराउँदैनन्’ उनले भने, ‘दर्शक र समीक्षकको बाटो नै फरक छ । यद्यपि, समीक्षकहरूलाई पनि खुशी पार्ने कोसिस गरौँला ।’

दर्शकबाट आएको प्रतिक्रिया नै रियल भएको दीपकको धारणा थियो । 

उनले अभिनेता अनमोलको फिल्म ‘छड्के २’लाई लिएर सबैका सबै फिल्म सफल नहुने प्रतिक्रिया दिए । ‘घोडा चढ्ने मानिस लड्छ । सबैका फिल्महरू सबै सफल हुँदैनन् । अनमोल योङ छ । उ सँग त्यति लामो करिअर छ । हामीजस्तो उमेर अलि ढल्केको होइन’ उनले अनमोललाई शुभकामना दिँदै भने । 

कलाकारले मात्रै फिल्म हिट बनाउन सक्दैन, अनमोललाई फ्लप भन्न मलाई अप्ठ्यारो लाग्छ : दीपाश्री निरौला

निर्मात्री एवं अभिनेत्री दीपाश्री निरौलाले आफू अनमोलको अभिनय लगायतको ठूलो फ्यान भएको बताउँदै ‘फ्लप’ भन्न अप्ठयारो लाग्ने बताइन् ।

‘म त अनमोलको एकदमै ठूलो फ्यान हो । उसको अभिनयदेखि सबैकुरा मनपर्छ मलाई’ उनले भनिन्,– ‘अनमोललाई फ्लप भन्न मलाई अप्ठ्यारो लाग्छ । किनभने एउटा कलाकारले मात्रै फिल्म हिट बनाउन सक्दैन ।’ 

दीपाश्रीले फिल्म हिट हुन सबै कुरा मिल्नुपर्ने बताइन् । ‘त्यही भएर त हामी टिमवर्क भनेर हिँडिरहेका हुन्छौं । त्यसकारण अनमोललाई त्यस्तो शब्द पनि खर्च नगरौँ होला’ उनले भनिन् । 

दीपाश्रीको कुरामा सहमति जनाउँदै अभिनेता अभिनेता दीपकराजले थपे, ‘कलाकारले हिट बनाउने होइन फिल्म । होल टिमले हिट बनाउने हो । अनमोलको सन्दर्भमा सायद टिम राम्रो परेन होला ।’