राष्ट्रिय जनमोर्चाका अध्यक्ष चित्रबहादुर केसीले सरकार बनाउने र भत्काउने खेलले देशको समृद्धि हुन नसक्ने बताएका छन् ।

सोमवार प्रतिनिधि सभाको बैठकमा प्रधानमन्त्री पुष्पकमल दाहाल प्रचण्डले विश्वासको मत लिनेसम्बन्धी प्रस्तावमाथिको छलफलमा बोल्दै केसीले संसदीय प्रणालीलाई स्वीकार गर्दै जाँदा अहिले यो प्रणाली चलाउन नै नसक्ने अवस्था आएको बताए ।

सरकार संसद्को ठूलो पार्टी र ठूलो पार्टीले नसके दोस्रो ठूलो पार्टीले बनाउनुपर्नेमा तेस्रो पार्टीलाई बोकेर हिँड्नु शर्मनाक रहेको उनको भनाइ छ ।

‘हाम्रो निर्वाचन प्रणालीले कसैको पनि बहुमत आउने स्थिति देखिँदैन । सरकार भत्काउने, बनाउने देखिएको छ । अब पनि यही हो । संसदीय प्रणालीलाई स्वीकार गरेका छौं, तर चलाउनै नसक्ने भयौं । संसदभित्र भएको ठूलो पार्टीले सरकार बनाउनुपर्ने हो कि होइन ? पहिलोले नसकेपछि दोस्रो पार्टीले बनाउने हो, तर तेस्रो पार्टीलाई समात्दै हिँड्ने ?’ केसीले भने ।

केसीले सरकार बनाउने र गिराउने खेती भइरहेको भन्दै यसरी लोकतन्त्र र गणतन्त्र जोगिन नसक्ने जिकिर गरे ।

अध्यक्ष केसीले सत्ता र स्वार्थका लागि मात्रै लड्न नहुने बताए ।

आफ्नो पार्टीले प्रधानमन्त्री पुष्पकमल दाहाललाई विश्वासको मत भने दिने उनको भनाइ छ ।