अपांग बालिकाउपर करणीको आरोपमा पक्राउ परेका व्यक्ति छुटाउन दबाब आएको पीडित पक्षले बताएका छन्। 

सुनसरी इनरुवा नगरपालिका-४ को उक्त घटनामा पीडक पक्षका आफन्तले पैसाको प्रलोभन दिएर मुद्दा फिर्ता लिन दबाब दिने गरेको पीडित पक्षको आरोप छ ।

करणी आरोपमा प्रहरीले संलग्न व्यक्तिलाई पक्राउ गरी कारबाही चलाइसकेको छ । प्रहरी प्रतिवेदनका आधारमा अदालतले प्रतिवादीलाई पुर्पक्षका लागि कारागार चलानसमेत गरिसकेको छ ।

यद्यपि, पीडित परिवारले भने धाकधम्की खेपिरहनुपरेको भन्दै गुनासो गरेका छन् । पीडकले आफूहरूलाई मुद्दा फिर्ता लिन धाकधम्की दिँदै आएको उनीहरूले बताएका हुन् ।

पीडितको घरमा केही दिनअघि आगलागी भएको थियो । जसलाई सुनियोजित दाबी गर्दै आएको पीडित परिवारले त्यसपछि भने असुरक्षित महशुस गरेको छ ।

मुद्दा फिर्ता लिन धम्की र आर्थिक प्रलोभनको विषय पीडित परिवारले बाहिर ल्याएको हो । पीडितकी आमाले आफूलाई आएको धम्कीबारे छिमेकीहरूले समेत साथ नदिएको आरोप लगाइन्।

घटनाको विषयमा सुनसरी प्रहरीले भने करणीको आरोपमा पक्राउ गरिएका व्यक्तिलाई जिल्ला अदालत बुझाइएको र त्यहाँबाट कारागार चलान भएको बताएको छ । 

घरमा लागेको आगलागीको पछिल्लो घटनाबारे भने थप अनुसन्धान जारी रहेको प्रहरी बताएको छ ।