बागलुङको तमानखोला गाउँपालिका–६ नर्जाखानीका जसदेवी छन्त्याल ३० वर्षमै एकल हुन पुगिन् । ब्रेन ट्युमरले ३ वर्षअघि पतिको मृत्यु भएपछि छन्त्याललाई छोरा र  छोरीको लालनपालन शिक्षादीक्षाकै चिन्ताले सताउन थाल्यो ।

खेती किसानीले मात्रै परिवार पाल्न धौंधौं भएपछि छन्त्याल स्थानीयको खेतबारीमा समेत काम गरेर जीविका चलाउँदै आएकी छन् ।

छन्त्यालले यसपटक भने वडा कार्यालयले सञ्चालन गरेको एकल महिला स्वरोजगार कार्यक्रममार्फत आफूलाई केही राहत भएको बताइन् । कार्यक्रमअन्तर्गत आफैं उपभोक्ता समितिको अध्यक्ष भएर उनले वडाका अन्य महिलालाई समेत कार्यक्रममा सहभागी गराएर स्वरोजगार बन्न थालेकी छन् ।

‘छोराछोरी पाल्न मुस्किल, खेती किसानीबाट घर खर्च चलाउन धौंधौं थियो, कार्यक्रममार्फत एकल महिला मिलेर ३ स्थानमा पदमार्ग बनाइयो,’ छन्त्यालले भनिन्, ‘१ जना एकल महिलाको हातमा यसपटक ६ हजार पर्‍यो २ महिनाको घर खर्च टर्‍यो, प्लाष्टिक टनेल समेत अनुदानमा दिएको छ ।’

चालू आर्थिक वर्षमा कार्यक्रममा विनियोजित १ लाख बजेटबाट सय मिटर पदमार्गमा ढुंगा छपाइएको छ । वडाका एकल महिलाले आफैं ढुंगा बोकेर नर्जाखानी, पात्ले र भित्रिवनमा पदमार्ग मर्मत गरेका हुन् । 

एकल महिलालाई सामाजिक काममा सक्रियता बढाउन खोजिएको र आगामी आवमा कार्यक्रमका लागि ५ लाख बजेट विनियोजन गर्ने तमानखोला गाउँपालिका–६ का वडाध्यक्ष चित्रबहादुर छन्त्यालले बताए ।

वडाध्यक्ष छन्त्यालका अनुसार नर्जाखानी, पात्ले र भित्रिवन गरी ३ वटा टोलमा छुट्टाछुट्टै पदमार्ग मर्मत तथा ढुंगा बिच्छाउने कार्य गरिएको हो । ‘घरमै सीमित एकल महिलालाई सामाजिक काममा सक्रीय गराउने र आयआर्जनमा जोड दिने गरी कार्यक्रममार्फत यस वर्ष १९ जनालाई रोजगारी दिइएको छ, उनीहरूले आफ्नै टोलमा पदमार्ग बनाएका छन्,’ छन्त्यालले भने ।

अहिले वडामा प्रधानमन्त्री स्वरोजगार कार्यक्रममार्फत सडक मर्मत, पदमार्ग निर्माण र ग्याविन जाली भर्ने काम भइरहेको छ । वडा कार्यालयले वडाको योजनाका लागि विनियोजित बजेटबाट निर्माण सामग्री खरिद गरेर प्रधानमन्त्री रोजगार कार्यक्रममार्फत काम गराउँदा योजना प्रभावकारी बन्दै गएको छ ।