रुसले युक्रेनविरुद्ध गत मार्च २४ मा ११ वटा ग्लाइड बम उपयोग गरेको खुलेको छ । 

ग्लाइडिङ बमहरूमा विशेष पखेटा जडान गरिएको हुन्छ । त्यसले गर्दा तिनीहरूलाई व्यापक दायरामा फैलिन, एकदमै कम उचाइमा उड्न र रेडारको नियन्त्रणमा रहेका हवाई प्रतिरक्षालाई छल्न समेत सहयोग गर्छ । 

युक्रेनी वायुसेनाका प्रवक्ता कर्नेल युरी इहनातले बेलायतको टेलिग्राफ पत्रिकासँग कुराकानी गर्दै यी बमहरूले निकै गम्भीर जोखिम तेर्स्याएको बताए । 

यी बमको दायरा व्यापक भएकाले रुसी जेट विमानहरूलाई युद्धभूमिमा अतिरिक्त जोखिम मोल्नु नपर्ने भएको छ । 

युक्रेनले रुसविरुद्ध प्रत्याक्रमण कारवाही थाल्ने भनी अपेक्षा गरिँदा युक्रेनी र पश्चिमी विश्लेषकहरूले रुसको नयाँ हतियारलाई विचार गर्दै किएभको युद्ध योजनामा परिवर्तन गरिनुपर्ने बताएका छन् ।