०२ साउन २०८३, शनिबार
सुडानमा संघर्षरत दुई सैन्य पक्षबीच साउदी अरबमा भएको वार्तामा कुनै उल्लेख्य प्रगति नभएको एक साउदी अधिकारीले सोमवार जनाएका छन् ।
लडाइँ अन्त्य हुने आशामा यसले तुषारापात गरेको छ ।
सुडानका सेनाप्रमुख अब्देल फत्तह अल–बुरहान र उनका प्रतिस्पर्धी अर्धसैनिक बलका प्रमुख मोहम्मद हमदान दाग्लोले जेद्दाहमा आफ्ना प्रतिनिधिलाई वार्ताका लागि पठाएका थिए । अमेरिका र साउदीले यसलाई सम्झौतापूर्वको वार्ता भनेका छन् ।
यस वार्तामार्फत अल्पकालीन रूपमा लडाइँ रोक्ने, सहायता आपूर्तिको वातावरण बनाउने, आधारभूत सेवालाई पुनर्बहाली गर्ने र स्थायी युद्धविरामका लागि सम्झौता गर्ने लक्ष्य लिइएको छ ।
दुवै पक्षले सहायता सामग्री उपलब्ध गराउनका लागि सहजीकरण गर्ने सुरक्षा उपायका विषयमा छलफल थालेका छन् । तर एक साउदी कूटनीतिकर्मीले यसमा उल्लेख्य प्रगति नभएको बताएका छन् ।
संयुक्त राष्ट्रसंघका शीर्ष अधिकारी मार्टिन ग्रिफिथ्स आइतवार जेद्दाह पुगेका छन् । उनले युद्धरत दुवै पक्षलाई भेट्ने कार्यक्रम छ । तर शान्ति प्रक्रियामा उनको भूमिका स्पष्ट छैन ।
