बुटवलदेखि पाल्पाको ऐतिहासिक स्थल वसन्तपुर जोड्ने गरी ठूलो लगानीमा निर्माण भएको लुम्बिनी केबलकार प्रालि तयार भएको छ ।

बुटवल र पाल्पाको तिनाउ गाउँपालिका– ३ मा पर्ने ऐतिहासिक तथा पुरातात्विक क्षेत्र वसन्तपुर जोड्ने केबलकारको निर्माण पूरा गरेर प्राविधिक परीक्षणको काम चलिरहेको छ । केबलकार यही जेठ १० गतेदेखि व्यावसायिक रूपमा सञ्चालनमा आउने प्रालिले जनाएको छ । 

केबलकारका अध्यक्ष चन्द्र ढकालले यही जेठको ८ गतेदेखि नियमित सञ्चालनमा आउने जानकारी दिए । 

‘जेठ १० गतेदेखि कमर्सियल अपरेसनमा ल्याउने गरी काम गरिरहेका छौ,ं’ ढकालले भने, ‘जेठको १२ देखि १८ गतेसम्म वसन्तपुरमा निर्माण गरिएको कामाक्षा देवी मन्दिरमा महायज्ञ सञ्चालन गरिने र त्यही महायज्ञकै बीचमा औपचारिक उद्घाटन गरिने छ ।’ 

केबलकारको उद्घाटन प्रधानमन्त्री पुष्पकमल दाहाल ‘प्रचण्ड’ले गर्ने तयारी गरिएको छ । लुम्बिनी आएका आन्तरिक तथा बाह्य पर्यटकलाई वसन्तपुर लैजानेगरी बुटवल उपमहानगरपालिका वडा नम्बर– ३ बमघाटमा केबलकारको आधार स्टेसन बनेको छ भने टप स्टेसन वसन्तपुरमा छ ।

यो केबलकार करीब साढे २ किलोमिटर लामो छ । केबलकारमा २५ वटा गोन्डुला (बाकस) रहेका छन् । एउटा गोन्डुलामा ८ जना यात्रु सवार हुन मिल्छ । यसमा प्रतिघण्टा ६०० यात्रु आवतजावत गर्न सक्ने छन् । 

यो केबलकार नियमित सञ्चालनमा आउँदा दैनिक ५ हजार जनालाई ओहोरदोहार गराउन सकिने अध्यक्ष ढकालले बताए । 

केबलकारको टप स्टेसन वसन्तपुरमा क्यासिनोसहित १५० कोठा भएको पाँचतारे होटल, कामाक्षा देवी मन्दिर, छुट्टाछुट्टै भेज, ननभेज रेस्टुरेन्ट, बार तथा पार्कसहितका संरचना निर्माणमा करीब ५ अर्ब लगानी भएको छ । 

वसन्तपुरलाई पर्यटकीय गन्तव्यको रूपमा विकास गरी भारतीय पर्यटक भित्र्याउने लक्ष्यसहित त्यसको आधारका रूपमा केबलकार निर्माण गरिएको हो । यसले पाल्पाको वसन्तपुर क्षेत्रमा मात्र नभएर त्यसको आधार स्टेसन रहेको बुटवल र आसपासको पर्यटन विकास र आर्थिक गतिविधिलाई पनि चलायमान बनाउने अपेक्षा छ ।

यो केबलकार तत्कालीन प्रधानमन्त्री केपी शर्मा ओलीले २०७७ फागुन १ गते शिलान्यास गरेका थिए ।

बुटवलदेखि पाल्पाको नुवाकोटसम्म पुग्ने सिद्धार्थ केबलकार पनि निर्माणाधीन छ । यो केबलकार आउँदो दशैँसम्ममा सञ्चालनमा आउनेछ ।