२१ जेठ २०८३, बिहीबार
भारत भ्रमणमा रहेका प्रधानमन्त्री पुष्पकमल दाहाल ‘प्रचण्ड’ आज शुक्रवार उज्जैनको महाकालेश्वर मन्दिरमा पूजाअर्चना गर्दैछन् ।
राजधानी नयाँदिल्लीबाट प्रधानमन्त्री प्रचण्ड इन्दोरतर्फ प्रस्थान गरिसकेका छन् । इन्द्रोरबाट ५० किलोमिटर सडकयात्राबाट प्रचण्ड उज्जैन पुग्नेछन् ।
प्रधानमन्त्री प्रचण्डको यात्रालाई मध्यनजर गरेर सडकलाई एकतर्फी मात्रै सञ्चालन गरिएको छ भने एकातर्फ बन्द गरिएको छ । प्रचण्डले पूजा गर्ने समयमा मन्दिरलाई सर्वसाधारणका लागि बन्द गरेर सुरक्षा व्यवस्था कडा पारिएको छ ।
भारत भ्रमणका क्रममा प्रचण्डको व्यक्तिगत इच्छाअनुसार नै उज्जैनको महाकालेश्वर मन्दिरमा पूजाअर्चना गर्ने कार्यक्रम तय भएको स्रोतले जनाएको छ । मन्दिरमा पूजाका क्रममा प्रचण्डले १०८ वटा रुद्राक्ष माला चढाउने बताइएको छ ।
प्रचण्डसँगै पूजाअर्चनामा छोरी गंगा दाहाल पनि सरिक हुनेछिन् । प्रधानमन्त्री प्रचण्डले पत्नी सीता दाहालको स्वास्थ्य लाभको कामना गर्दै महाकालेश्वर मन्दिरमा पूजा गर्ने कार्यक्रम राखेको स्रोतको दाबी छ ।
प्रधानमन्त्री प्रचण्डले भ्रमणका क्रममा मध्यप्रदेशका राज्यपालसँग भेटवार्ता गर्ने कार्यक्रम छ । स्वच्छ भारत अभियानअन्तर्गत इन्दोर म्युनिसिपल कर्पोरेसनले सम्पादन गरेको कामबारे उनले जानकारी लिने कार्यसूची छ ।
फोहोर व्यवस्थापनमा सकारात्मक परिणाम देखिएको इन्दोरको असल र सफल अभ्यासको अवलोकनपछि प्रधानमन्त्री प्रचण्डकोे सम्मानमा मध्यप्रदेशका मुख्यमन्त्री शिवराजसिंह चौहानले रात्रिभोजको आयोजना गर्नेछन् ।
शनिवार प्रधानमन्त्री दाहाल नेतृत्वको प्रतिनिधिमण्डलले ‘टीसीएस इन्फोसिस’ विशेष आर्थिक क्षेत्रको भ्रमण गर्ने कार्यक्रम छ । बिहीवार प्रधानमन्त्री प्रचण्ड र भारतीय समकक्षी नरेन्द्र मोदीसँग भेटवार्ताका अलावा २ देशबीच महत्त्वपूर्ण विषयमा सहमति तथा समझदारी भएको थियो । प्रधानमन्त्री प्रचण्ड शनिवार स्वदेश फर्कने कार्यक्रम छ ।
