प्रमुख प्रतिपक्षी दल नेकपा एमालेले प्रधानमन्त्री पुष्पकमल दाहाल प्रचण्डले भारत भ्रमणका क्रममा गैरजिम्मेवार र राष्ट्रहीतविपरीत अभिव्यक्ति दिएको ठहर गरेको छ । 

शनिवार बानेश्वरमा बसेको एमाले संसदीय दलको बैठकले प्रधानमन्त्रीप्रचण्डले भारत भ्रमणका क्रममा गैरजिम्मेवार अभिव्यक्ति दिएकोप्रति संसदमा जवाफ माग गर्ने निर्णय गरेको बैठकपछि एमालेका प्रमुख सचेतक पदम गिरीले जानकारी दिए । 

भ्रमणका क्रममा सीमा समस्याका बारेमा कुरा राख्न नसकेको, ईपीजी प्रतिवेदन बुझ्ने विषयमा छलफल हुन नसकेकोलगायत विषयमा प्रधानमन्त्रीसँग संसद्‌मा जवाफ माग गर्ने निर्णय गरिएको उनले बताए ।

प्रधानमन्त्रीले भरत भ्रमणका क्रममा देशहीतका कुनै विषय उठान गर्न नसकेको उनले बताए ।

प्रधानमन्त्री प्रचण्डले भारत भ्रमणका क्रममा बङलादेशसम्म पुग्ने बाटो दिए कालापानी र लिपुलेक दिन सकिने अभिव्यक्ति दिएका थिए । 

उनले नेपाल फर्केपछि पनि सीमा विवाद समाधन गर्न ‘बंगलादेश मोडल’ बारे पनि छलफल भएको स्वीकारेका छन् ।