१३ असार २०८३, शनिबार
नेपाल टेलिकम तीव्र गतिको मोबाइल इन्टरनेट फाइभजी प्रविधिमा प्रवेश गरिसकेको छ । फाइभजीको आन्तरिक परीक्षण गरेर व्यावसायिक प्रयोग गर्न उपयुक्त समयको पर्खाइमा टेलिकम छ । तर टेलिकमका ५८ लाख ७० हजार प्रयोगकर्ता भने अझै थ्रजी प्रविधिमै छन् ।
टेलिकमको सेवा प्रयोग गरेर मोबाइल इन्टरनेट (डेटा) प्रयोग गर्नेको संख्या १ करोड ८२ लाख भन्दा बढी छ । यसमध्ये अहिलेसम्म १ करोड २३ लाख भन्दा बढीले फोरजी डेटा प्रयोग गरिरहेका छन् भने अझै ५८ लाख प्रयोगकर्ता थ्रीजी मै रहेका नेपाल दूरसञ्चार प्राधिकरणले वैशाखमा सार्वजनिक गरेको फागुनसम्मको तथ्यांकले देखाएको छ ।
टेलिकमको थ्रीजी नेटवर्कमा चल्ने इभीडीओका प्रयोगकर्ता पनि १ लाख ३६ हजार छन् । टेलिकमका प्रवक्ता शोभन अधिकारीका अनुसार पुरानो प्रविधि भए पनि ग्राहकले अझै प्रयोग गरिरहेकाले टेलिकमले इभीडीओको सेवा दिँदै आएको हो । यो प्रविधि टेलिकमले विस्थापन गर्दै गरेको सीडीएमए प्रविधिको सीमकार्डबाट चल्छ । ग्राहकले रुचाएर चलाइरहेको र सन्तुष्ट ग्राहकलाई सेवा दिइरहनुपर्ने दायित्व भएर इभीडीओ पनि सञ्चालनमा रहेको टेलिकमले जानकारी दिएको छ ।
पछिल्लो समय सबैतिर फोरजी चल्छ । फोरजीबाट इन्टरनेट चलाउँदा पनि प्याकेज लिन सकिने, थ्रीजीको तुलनामा गति तीव्र हुने र तुलनात्मक रूपमा महंगो पनि नभएकाले ५८ लाख टेलिकमका ग्राहक थ्रीजीमै सीमित छन् ।
टेलिकमका सहप्रवक्ता परमात्मा भट्टराईका अनुसार पुराना ग्राहकले आफूलाई अपडेट नगराएको, पुरानो सीमकार्ड हुनेले परिवर्तित नयाँ सीम नलिएको र थ्रीजीमै केही ग्राहक सन्तुष्ट रहेकाले फोरजीमा अपडेट नहुँनेको संख्या ५८ लाख कायम भएको हो ।
पछिल्लो समय वितरण हुने सबै सीम फोरजीकै हुने गरेको भए पनि ग्राहकले प्रयोग गर्ने सेटका कारण थ्रीजीका प्रयोगकर्ताको संख्या ठूलो देखिएको उनका बुझाई छ ।
उनका अनुसार विस्तारै ग्राहकले आवश्यकताका आधारमा अफूलाई अपडेट गर्दै जाँदा फोरजी प्रयोगकर्ताको सख्या बढ्दै जाने र थ्रीजीको घट्दै जानेछ ।
टेलिकमका २ करोड ८ लाख प्रयोगकर्ता पुगेका छन् । ब्रोडब्याण्ड प्रयोगकर्तासमेत गरेर इन्टरनेट प्रयोग गर्नेको संख्या भने १ करोड ९६ लाख पुगेको छ । यसमध्ये तारको माध्यमबाट विस्तार भएको एडीएसएलका प्रयोगकर्ता २ लाख ८१ हजार र एफटीटीएचका प्रयोगकर्ता ९ लाख ७३ हजार रहेका टेलिकमले जनाएको छ ।
