२१ जेठ २०८३, बिहीबार
काठमाडौं, २५ भदौ— पशुपति शमशेर राणा नेतृत्वको राप्रपा प्रजातान्त्रिकका केहि सांसदले नेतृत्वविरुद्ध विद्रोहको तयारी गरेका छन् ।
सरकारमै जाने विषयमा राप्रपा अध्यक्ष कमल थापासँग विद्रोह गरेर नयाँ पार्टी गठन गरेका राणाविरुद्ध फेरि केहि सांसदहरुले विद्रोहको तयारी गरेका हुन् । रोचक त के छ भने व्रिदोहको तयारी पनि त्यही सरकारकै विषय रहेको छ ।
राप्रपा प्रजातान्त्रिक स्रोतका अनुसार पार्टीमा कुनै छलफल नगरी सुनील थापा, दीपक बोहरा र विक्रम पाण्डेलाई शेरबहादुर देउवा नेतृत्वको सरकारमा सहभागि गराउन लागिएपछि पद नपाउनेहरु आक्रोशित बनेका छन् । उनीहरुले नेतृत्वले निर्णय नसच्याए सभासद र केन्द्रीय सदस्य पदबाट राजीनामा दिनेसम्मको चेतावनी दिएका छन् ।
यसरी चेतावनी दिनेहरुमा तत्कालिन राप्रपाले संविधान संशोधनको पक्षमा मतदान गर्ने निर्णय गर्दा गायव बनेका सांसदहरुमध्ये कम्तीमा ७ जना समेत रहेका छन् ।
आइतबार बिहान राप्रपा प्रजातान्त्रिकको कार्यालयमा बसेको संसदीय दलको बैठकमा बोहरा, थापा र पाण्डेलाई सहकारमा पठाउने निर्णय सुनाइएको थियो । यस्तै राज्यमन्त्रीको रुपमा रेशम कुमार लामालाई पठाउने निर्णय पनि भएको बताइएको थियो ।
पार्टी विभाजनका बेला राणालाई बलियो साथ दिएपनि लाभको पद लिने बेलामा भने सीमित टाउके नेताहरुलाई मात्रै अवसर दिएको गुनासो असन्तुष्टहरुको छ । हाल मन्त्री हुने तयारीमा रहेका बोहरालाई उपाध्यक्ष र संसदीय दलको नेता पनि बनाइएको छ भने पाण्डेपनि उपाध्यक्ष र दलको उपनेता रहेका छन् । यस्तै सुनील थापा महामन्त्री हुन् । यता अर्का महामन्त्री लामालाई पनि राज्यमन्त्री बनाइन लागिएको तर सारथीहरुलाई भने मन्त्री बनाइनुको साटो छलफल समेत नगरिएकाले आक्रोश पैदा भएको पार्टी स्रोत बताउँछ ।
लाभको पद दिइँदा पूर्व राप्रपा नेपाल पृष्ठभूमिकालाई त झन् महत्व नदिइएको एक सांसदले बताए । पार्टी विभाजन हुँदा राप्रपा नेपाल पृष्ठभूमिका ६ सांसदसहित दर्जनौं केन्द्रीय सदस्यले राणालाई साथ दिएका थिए ।
राप्रपा सांसद राज्यलक्ष्मी श्रेष्ठले पार्टीमा ८ जना महिला सांसद रहेको भएपनि एकजनालाई पनि स्थान नदिइनु दुःखद भएको बताइन् । उनले आफू पदको लागि मरिहत्ते गर्ने मान्छे नभएपनि पार्टीमा उचित सम्मान नहुँदा मन दुखेको बताइन् ।
भोलि सोमबार यसबारेमा अध्यक्षलाई भेटेर आफूहरुले खुलस्त कुरा राख्ने भन्दै आजको भेटमा सबैलाई समेटेर अघि बढ्ने आश्वासन पाएको उनको भनाई छ ।
पार्टी विभाजन भएको एक महिना नबित्दै राप्रपामा समस्या हुनुलाई पूर्वपञ्चहरुको पार्टी सत्ताकै वरिपरी रहने प्रवित्तिको रुपमा धेरैले लिएका छन् ।
राणाले व्यवस्थापन नगरे सांसदहरुले राजीनामा दिनेसम्मको तयारी गरेको भएपनि अहिले पार्टी विभाजन भने नहुने निश्चित छ । किनकी एक पटक फुटेको पार्टी एक वर्षसम्म पुन: विभाजन हुन नपाउने प्रावधान रहेको छ । यद्यपी पार्टीलाई ठूलै धक्का भने पुग्ने निश्चित छ ।
राणाले कमल थापाको कार्यशैलीप्रति विमती जनाउँदै गत साउन २२ गते पार्टी फुटाएर निर्वाचन आयोगमार्फत नयाँ दलको मान्यता प्राप्त गरेका थिए ।
