२१ जेठ २०८३, बिहीबार
प्रमुख तीन दलका शीर्ष नेताहरूको बैठक सकिएको छ । शीर्ष नेताहरूको बैठकपछि बुधवारदेखि जारी प्रतिनिधिसभाको अवरोध आजदेखि हट्ने भएको छ ।
प्रधानमन्त्री पुष्पकमल दाहाल ‘प्रचण्ड’को पहलमा सिंहदरबारस्थित प्रधानमन्त्री तथा मन्त्रिपरिषद् कार्यालय बसेको बैठकमा संघीय संसदको अवरोध खुलाउन सहमति भएको प्रधानमन्त्रीको सचिवालयले जानकारी दिएको छ ।
तीन शीर्ष नेताहरूबीच भएको वार्तापछि प्रधानमन्त्री प्रचण्डले असार १८ गते दिएको आफ्नो अभिव्यक्तिबारे स्पष्टीकरण दिने सहमतिसँगै एमाले अवरोध खुलाउन तयार भएको हो ।
प्रतिनिधि सभा बैठक आजै दिउँसो ३ बजे बस्दै छ ।
गत बुधवारदेखि प्रमुख प्रतिपक्षी नेकपा(एमाले)लगायतका दलले संघीय संसदका दुवै सदनको बैठक अवरोध गर्दै आएका छन् ।
सिंहदरबारमा बसेको बैठकमा प्रधानमन्त्री प्रचण्ड, प्रमुख प्रतिपक्षी दल नेकपा (एमाले)का अध्यक्ष केपी शर्मा ओली र नेपाली कांग्रेसका सभापति शेरबहादुर देउवा सहभागी थिए ।
