मुलुककै दोस्रो ठूलो भैरहवा भन्सार कार्यालयले गत आर्थिक वर्ष २०७९/८० मा जम्मा ७० अर्ब मात्र आम्दानी गरेको छ । यो कुल लक्ष्यको ४९.४१ प्रतिशत मात्र हो । भैरहवा भन्सारले गत आवमा १ खर्ब ५५ अर्ब ६० करोड राजस्व संकलन गर्ने लक्ष्य लिएको थियो ।

जसमध्ये असार मसान्तसम्म ७० अर्ब २ करोड ४० लाख रूपैयाँ मात्र संकलन भएको छ । भैरहवा भन्सार कार्यालयका प्रमुख मणिराम पौडेलले जुन पछिल्लो ८ वर्षयताकै कम राजश्व संकलन भएको बताए ।

‘आर्थिक मन्दीका कारण कम आयात हुनु, राज्यको अन्य नीतिगत समस्याका कारण राजस्व असुली खुम्चिन पुगेको देखिन्छ’ पौडेलले भने । आर्थिक वर्ष २०७८/७९ मा पनि भन्सार विभागले दिएको लक्ष्य भैरहवा भन्सारले ९ प्रतिशतले पूरा गर्न सकेको थिएन ।

१ खर्ब १५ अर्ब ८७ करोड ८७ लाख २४ हजार संकलन भएको थियो । मुलुकको समग्र भन्सार राजश्व संकलनमा भैरहवा भन्सारका योगदान १२ प्रतिशतभन्दा बढी छ । तर यसपटक भने राजश्व असुली घट्दा मुलुकको राजस्व लक्ष्यमै प्रभाव परेको छ ।

राजश्व संकलन कम भएपछि भैरहवा भन्सारले सीमावर्ती बजारमा किनमेल गर्न जाने नेपालीलाई कडाइ गर्न थालेको छ ।

भारतीय बजारमा दैनिक उपभोग्य सामान किनेर आउने नेपालीलाई १०० रूपैयाँभन्दा बढीको किनमेललाई अनिवार्य भन्सार गर्न थालिएको प्रमुख पौडेल बताउँछन् । भन्सारमा कडाइ गर्दा चोरी तस्करी बढेको छ । देशमा देखिएको आर्थिक मन्दी र सबै क्षेत्र सुस्ताउँदा त्यसको असर भन्सार राजश्वमा पनि ठूलो मात्रामा देखिएको पौडेलको बुझाई छ । 

तर भैरहवा भन्सार हुँदै निर्यात हुने भने बढेको छ । आर्थिक वर्ष २०७८/०७९ को तुलनामा आव २०७९/०८० मा ३८ दशमलव ८ प्रतिशतले निर्यात वृद्धि भएको देखिन्छ । कार्यालयको तथ्यांक  अनुसार अघिल्लो आवमा ७ अर्ब ८९ करोड २३ लाख ५४ हजार रुपैयाँ मूल्यका नेपाली वस्तु निकासी भएकोमा २०७९/०८० मा यो निकासी बढेर १० अर्ब ९५ करोड ७६ लाख ९१ हजार रुपैयाँ पुगेको छ ।

खजुरको प्रशोधित तेल, खोटो रोजिन, पिना, चोकर भुस लगायतका वस्तु भैरहवा हुँदै निर्यात हुने गरेका छन् ।

गत आवबाट बेलहिया नाका हुँदै सिमेन्ट र छड पनि निर्यात भएको थियो । भन्सार तथ्यांकअनुसार सेन्थेटिक यार्न ३ अर्ब १६ करोड ५३ लाखको निर्यात भएको छ । यस्तै, खजुरको प्रशोधित तेल १ अर्ब ३ करोड, खोटो रोजिन ५४ करोड ३९ लाख रुपैयाँको निर्यात भएको छ ।

यस्तै, वनस्पति उत्पादनहरू ४६ करोड २ लाख, पिना लगायत अन्य वस्तु ४५ करोड २६ लाख, सिमेन्ट र क्लिंकर ४० करोड ९१ लाख, अल्किड रेजिन र अन्य पीभीसी ३६ करोड ८९ लाख, चोकर, भुस ३६ करोड २० लाख रुपैयाँको निकासी भएको छ ।

नुडल्स, पास्ता लगायत ३२ करोड ४८ लाख रुपैयाँ र सिमेन्ट खैरो ३१ करोड ८६ लाख रुपैयाँ बराबरको निर्यात भएको छ । सिद्धार्थ उद्योग वाणिज्य संघका अध्यक्ष ठाकुरकुमार श्रेष्ठले सरकारले निर्यातमा केही नीतिहरू सुधार गर्दा निकासी बढेको जनाए ।