१० साउन २०८३, आइतबार
राजधानीको सामाखुसीमा एक स्कुले बालक बाढीले बगाएर बेपत्ता भएका छन् । घटनाको खबरपछि प्रहरी र सशस्त्र प्रहरीको टोलीले उद्दार कार्य सुरु गरेपनि उनी राति अबेरसम्म फेला पर्न सकेका छैनन् ।
आइतबार साँझ स्कुलबाट फर्किएपछि भोजपुर घर भई सामाखुसी बस्दै आएका सागन मगरलाई स्थानीय सामाखुसी खोलाले बगाएको हो ।
पानीपोखरीस्थित भानुभक्त माविमा कक्षा ६ मा अध्ययनरत बालक विद्यालयबाट फर्किएपछि साथीसँगै रानीबारीमा रहेको फुटसलमा फुटबल खेल्न जाने क्रममा खोलामा खसेका हुन् ।
जिल्ला प्रहरी परिसर काठमाडौँका प्रवक्ता तथा एसपी सीताराम रिलालले खोला फड्किएर पार गर्न खोज्दा उनी चिप्लिएर खसेको जानकारी दिए ।
उनीसँगै गएका साथीले अरुलाई खबर नगरी खोज्न थाल्दा प्रहरीले ढिलागरी खबर पाएको बताइएको छ । नजिकै प्रहरी चौकी भएपनि खबर नहुँदा ३० मिनेटपछि मात्रै प्रहरीले थाहा पाएर उद्दारका लागि पुगेपनि फेला नपरेको स्थानीयको भनाइ छ ।
साँझ ५ः४० बजेदेखि बेपत्ता १३ वर्षीय बालक मगरको आमा पोर्चुगलमा रहेको खुलेको छ । यस्तै बुबाको भने दोहोरी साँझ रहेको बताइएको छ ।
अँध्यारोका कारण आज खोजी कार्य स्थगित भएको र बालकको अवस्था अज्ञात रहेको प्रहरीले जनाएको छ । प्रहरीले अब सोमबार बिहानैदेखि खोजी कार्य सुरु गरिने जनाइएको छ ।
