विदेशमा श्रम बेचेर स्वदेश फर्किएका एक युवाले आफूझैँ विदेशिनु नपरोस् भन्नका लागि ३० युवालाई निःशुल्क कपाल काट्ने तालिम दिन थाल्नुभएको छ । तालिमको आज एक कार्यक्रमबीच उद्योग वाणिज्य सङ्घ चितवनका अध्यक्ष चुननारायण श्रेष्ठले उद्घाटन गरे । 

भरतपुरस्थित सिजी ल्यान्डमार्कमा रहेको पपुलर युनिसेक्स सैलुनका सञ्चालक सुलभ सिग्देलले स्वरोजगार बनाउन स्थानीय युवालाई तालिम दिन सुरु गरेका हुन् । तालिम उद्घाटन समारोहमा श्रेष्ठले आफूले रकम बचाएर निःशुल्क तालिम गरेकामा सिग्देललाई बधाई दिँदै सहभागीलाई तालिमपछि स्वदेशमै स्वरोजगार बन्न सुझाव दिए ।

कार्यक्रममा नेपाल पत्रकार महासङ्घ चितवनका अध्यक्ष नारायण अधिकारी, कृषि तथा वन विज्ञान विश्वविद्यालयका डा निराजन भट्टराईलगायतले आ–आफ्नो धारणा राखेका थिए । विदेशबाट फर्किएर सैलुन सञ्चालन गर्दै आएका सिग्देलले आफ्नो निजी खर्चबाट तालिम दिन लागेका हुन् । उनका अनुसार तालिमका लागि ८३ जनाले दरखास्त दिएकामा उनीहरूबाट ३० जना छनोट गरिएको हो । तीमध्ये छ जना महिला छन् । 

पैतालीस दिनसम्म उनीहरूलाई दाह्री र कपाल काट्ने तालिम दिइने छ । यससँगै उहाँहरूले आफैँले सैलुन सञ्चालन गर्न सक्ने उनले जानकारी दिए ।