नेपाल राष्ट्र बैंकको बैंकिङ विभागमा नेपाल पे र फोन पे दुवै नेटवर्कको क्यूआर कोड सेवा सञ्चालनमा आएको छ ।

विदेशी मुद्रा सटही गर्न चाहने सेवाग्राहीको सहजताका लागि प्रत्यक्ष डिजिटल भुक्तानी सेवालाई बढावा दिने उद्देश्यका साथ क्यूआर कोड सञ्चालनमा ल्याएको माछापुच्छ्रे बैंकले जनाएको छ ।

नेपाल राष्ट्र बैंकका कार्यकारी निर्देशक दयाराम शर्मा पगेंनी र माछापुच्छ्रे बैंकका प्रमुख कार्यकारी अधिकृत सन्तोष कोइरालाले संयुक्त रुपमा सेवाको शुरुवात गरेका हुन् ।

उक्त सेवाबाट नेपाल राष्ट्र बैंकमा विदेशी मुद्रा सटही लिन आउने सेवाग्राहीहरूले क्यूआरमार्फत भुक्तानी गरी सटही सुविधा लिन सक्ने छन् । जसले गर्दा सेवाग्राहीहरूको काम छिटोछरितो हुने र नगदरहित कारोबारलाई समेत टेवा पुग्ने बैंकले जनाएको छ ।

यस बाहेक फरक–फरक माध्यमहरूमार्फत डिजिटल भुक्तानी सुविधालाई सहज बनाउन आफ्ना ग्राहकहरूका लागि नवीन उत्पादन र सेवाहरू ल्याउन तयार रहेको पनि बैंकले जारी गरेको विज्ञप्तिमा उल्लेख छ ।

नगदरहित बैंकिङलाई बढावा दिँदै पहिलो डिजिटल ‘स्मार्ट बैंक’को रुपमा आफूलाई स्थापित गर्ने लक्ष्यमा निरन्तर अगाडि बढिरहेको बैंकले जनाएको छ ।