साउन २ गते त्रिभुवन विमानस्थल भन्सार बाहिरबाट जफत गरिएको सुन गालेर बिस्कुट स्वरूपमा ढालिएको छ । नेपाल राष्ट्र बैंकको टक्सार विभागमा बरामद सुन मंगलवार गालिएको हो । 

मोटरसाइकलको ब्रेक सुमा लुकाएर ल्याएको सुन हिजादेखि जोख्ने प्रक्रिया शुरू गरिएको थियो । ब्रेक सुबाट निकालिएको सुन निकाल्दा हिजो ६० किलो ७ सय ८९ ग्राम भएको थियो । 

ब्रेक सुबाट निकालिएको सुन आज गालेर बिस्कुटको स्वरूपमा ढालिएको हो । भन्सार तिरेर आयात गरिने सुनको स्वरूपमै बिस्कुट आकारमा बनाइएको हो । 

नेपाली सेना, नेपाल प्रहरी र मिडियाको अगाडि सुन गालिएको थियो । गालिएको सुनको औपचारिक तौल केहीबेरमा सार्वजनिक गरिने नेपाल राष्ट्र बैंक टक्सार विभागका प्रमुख थानेश्वर आचार्यले जानकारी दिए । 

शुरूमा एक क्विन्टल रहेको भनिएको सुन हिजो जोख्दा झण्डै ६१ किलोमा झरेको थियो । अझै केही घट्न सक्ने अनुमान छ ।