काठमाडौंमा बसले मोटरसाइकललाई ठक्कर दिँदा २ जनाको मृत्यु भएको छ ।

आज (आइतवार) बिहान काठमाडौं महानगरपालिका-१५ अन्नपूर्ण चोकस्थित ढुङ्गेधारामा मूल सडक खण्डमा बसले ठक्कर दिँदा दुई जनाको ज्यान गएको काठमाडौं प्रहरी परिसरले जनाएको छ । 

प्रहरीका अनुसार बालाजुबाट कलंकीतर्फ आउँदै गरेको ना ५ ख ५०९२ नम्बरको बसले विपरीत दिशाबाट आउँदै गरेको मोटरसाइकललाई ठक्कर दिएको हो । 

बसको ठक्करबाट गम्भीर घाइते भएका उनीहरूको उपचारको क्रममा टिचिङ अस्पतालमा मृत्यु भएको प्रहरीले जनाएको छ ।

प्रहरीका अनुसार ज्यान गुमाउनेमा सिन्धुपाल्चोकको साँगाचोकगडी नगरपालिका घर भएका ३२  वर्षीया अनिता थापा र ३२ वर्षीय अर्का पुरुषको ज्यान गएको हो । उनको पहिचान हुन सकेको छैन ।

दुर्घटनामा नौ वर्षीय बालिका अनिशा थापा घाइते भएकी छन् । टाउकोमा चोट लागेर घाइते भएकी थापाको मनमोहन अस्पतालमा उपचार भइरहेको छ । 

बस र चालकलाई नियन्त्रणमा लिएर अनुसन्धान भइरहेको प्रहरीले जनाएको छ ।