०७ साउन २०८३, बिहीबार
प्रधानमन्त्री पुष्पकमल दाहाल प्रचण्डले संसद्मा जारी गतिरोध अन्त्यका लागि सहमतिको प्रयास भइरहेको भन्दै बैठक २ दिन पछि सार्न सभामुखसँग आग्रह गरेका छन् । प्रचण्डको आग्रहअनुसार सभामुख देवराज घिमिरेले बैठक मंगलवारसम्म स्थगित गरेका छन् ।
आइतवार सिंहदरवारमा बसेको सर्वदलीय बैठक सहमतिनजिक पुगेको भन्दै प्रधानमन्त्रीको सन्देश लिएर माओवादी संसदीय दलका प्रमुख सचेतक हितराज पाण्डे सभामुखलाइ भेट्न वानेश्वर पुगेका थिए ।
‘बैठकको निर्णय जानकारी दिन माओवादी प्रमुख सचेतक पाण्डे सिंहदरबारबाट नयाँ बानेश्वर आउनुभएको थियो । उहाँले आजको बैठक सकारात्मक भएकोसमेत सभामुखलाई जानकारी गराउनुभएको छ,’ सभामुख घिमिरेको सचिवालयले भन्यो ।
त्रिभुवन विमानस्थल बाहिरबाट समातिएको ६० किलो सुन सम्बन्धमा उच्चस्तरिय छानबिन समिति गठनको मागगर्दै प्रमुख प्रतिपक्षी दल नेकपा (एमाले)ले साउन १० देखि प्रतिनिधिसभा अवरुद्ध गर्दै आएको छ । एमालेको विरोधका कारण संसद् नियमित कार्यसूचीमा प्रवेश गर्न नसक्दा महत्वपूर्ण विधेयकहरू संसद्मा अड्किएर बसेका छन् ।
