चोरिएका दुई बच्चासहित बारा जिल्लाको देवताल गाउँपालिका ३ अमुवाबाट आज व्यक्तिलाई सशस्त्र प्रहरीले नियन्त्रणमा लिएको छ । 

बच्चाहरूलाई बोरामा राखेर भारततर्फ लैजाँदै गरेको अवस्थामा बीओपी दक्षिणझिट्कैयाले भारतको पूर्वीचम्पारण मुर्तिया ग्रामपन्चायत ४ आधारपुर घर भएका २२ वर्षीय ताबरेज आलमलाई नियन्त्रणमा लिएको हो । 

सोही गाँउपालिका- ३ नन्की अमुवा बस्ने शिवपुजन महत्तोकी ९ महिनाकी छोरी लक्ष्मी महत्तो र प्रेमचन्द महत्तोका २ वर्षका छोरा सत्यमकुमार महत्तोलाई आलमले चोरी गरी बोरामा हालेर भारततर्फ लैजाँदै गरेको अवस्थामा नियन्त्रणमा लिइएको सशस्त्र प्रहरीका प्रवक्ता डीएसपी शैलेन्द्र थापाले जानकारी दिए । 

सीमावर्ती इलाकामा गस्तीमा खटिएका सशस्त्र प्रहरीले शंका लागि आलमले बोकेको बोरा जाँचगर्दा दुईजना बच्चा फेला परेपछि उनलाई नियन्त्रणमा लिइएको उनले बताए । 

उद्धार गरिएका बच्चाहरूलाई अभिभावकको जिम्मा लगाइएको छ भने नियन्त्रणमा लिइएका आलमलाई आवश्यक कारबाहीका लागि स्थानीय प्रहरीमा बुझाइएको छ ।