‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेका २४ घण्टाका मुख्यमुख्य घटनाक्रमसहित उपस्थित भएका छौँ–

कोशी प्रदेशका मुख्यमन्त्री उद्धव थापाले सोमबार विश्वासको मत लिँदै छन् । साउन १६ गते दोस्रो पटक मुख्यमन्त्री नियुक्त भएका थापाले  प्रदेश सभाबाट विश्वासको मत लिने भएका हुन् । 

विश्वासको मत लिन थापाले शुक्रवार प्रदेशसभा सचिवालयमा सूचना दर्ता गराएका थिए । यससँगै विपक्षी दल विश्वासको मत फेला गराउन लागिपरेका छन् । 

गठबन्धनसँग बहुमत पुग्ने ४७ सांसद संख्या छ । तर, सभा सञ्चालन गर्न उपसभामुख सिर्जना दनुवार अनुपस्थित भए के गर्ने भन्नेमा गठबन्धनमा अन्योल देखिएको छ । उनी अनुपस्थित हुने सम्भावना रहेको बताइएको छ । 

कोशीमा गठबन्धनका कांग्रेस, नेकपा माओवादी केन्द्र, नेकपा एकीकृत समाजवादी र जनता समाजवादी पार्टी जसपाका ४७ प्रदेशसभा सदस्यको समर्थनमा थापा मुख्यमन्त्रीमा नियुक्त भएका हुन् ।

कोशी प्रदेशसभामा नेकपा एमालेका ४० र राष्ट्रिय प्रजातन्त्र पार्टीका ६ सांसद छन् । सदनमा एमाले र राप्रपा साथै छन् ।
आज बस्ने कोशी प्रदेशसभा बैठकमा नेकपा एमालेका ७ जना जेष्ठ सदस्यहरू अनुपस्थित हुने भएका छन् । मुख्यमन्त्री थापाले विश्वासको मत लिने बैठकमा उनीहरू अनुपस्थित भएका हुन् ।

एमालेका सांसदहरू रोहितबहादुर कार्की, मालतीकुमारी लिम्बू, रामप्रसाद महतो, तारादेवी ढकाल, किशोरचन्द्र दुलाल, ज्ञानेन्द्र सुवेदी अनुपस्थित हुने भएका हुन् ।

प्रदेशसभामा सभामुख र उपसभामुख नभएको अवस्थामा जेष्ठ सदस्यले बैठक सञ्चालन  गर्ने व्यवस्था छ ।
प्रदेशसभामा सबैभन्दा जेष्ठ सदस्य नेपाली कांग्रेसका गयानन्द मण्डललाई यसअघि मुख्यमन्त्री थापाले राज्यमन्त्री बनाइसकेका छन् । मण्डल पछिका सत्ता गठबन्धनका जेष्ठ सदस्य उद्धव थापा मुख्यमन्त्री छन् ।

राप्रपाका प्रदेशसभा सदस्यहरू आजको प्रदेशसभा बैठकमा अनुपस्थित हुने भएका छन् । मुख्यमन्त्री थापाले विश्वासको मत लिने दिन उनीहरू अनुपस्थित हुने भएका हुन् । 
कोशी प्रदेशमा राप्रपाका ६ जना सांसद छन् । उनीहरूलाई बैठकमा अनुपस्थित हुन पार्टीका केन्द्रीय अध्यक्ष राजेन्द्र लिङ्देनले निर्देशन दिएका छन् ।
पाटीको निर्देशन आएकै कारण आजको बैठकमा सहभागी नहुने राप्रपाका प्रदेशसभा सदस्य अम्बरबहादुर विष्टले बताए ।
००००
संसद् गतिरोध अन्त्यको पहलस्वरुप राष्ट्रपति रामचन्द्र पौडेलले सर्वदलीय बैठक आह्वान गरेका छन् । 
भदौ ५ गते मंगलवार बिहानका लागि बैठक आह्वान गरिएको राष्ट्रपति पौडेलका प्रेस सल्लाहकार किरण पोखरेलले लोकान्तरलाई जानकारी दिए । बैठकमा प्रतिनिधिसभामा प्रतिनिधित्व गर्ने सबै दललाई बोलाइएको छ । 

यसैबीच प्रधानमन्त्री प्रचण्डले आज पनि राष्ट्रिय दलहरुसँग छलफल गर्ने भएका छन् । आइतबार समेत प्रचण्डले छलफल गरेकामा एमाले अध्यक्ष केपी शर्मा ओली उपस्थित नभएपछि बैठक निष्कर्षविहीन बनेको थियो । 

एमालेले सुन तस्करी प्रकरणमा उच्चस्तरीय छानबिन समितिको माग गर्दै आएपनि सरकारले त्यसलाई अस्वीकार गर्दै आएको छ ।
००००
संसदमा जारी गतिरोध हटाउन प्रधानमन्त्री पुष्पकमल दाहाल प्रचण्डले बोलाएको बैठकमा सहमति जुट्न नसकेपछि प्रतिनिधिसभा बैठक भदौ ५ गते मंगलवारसम्मको लागि स्थगित भएको छ ।
सरकारको आग्रहमा बैठक मंगलवारसम्मको लागि बैठक स्थगित गरिएको संसद सचिवालले जनाएको छ । 
००००
नेकपा माओवादी केन्द्रका उपमहासपचिव वर्षमान पुनले प्रमुख प्रतिपक्षी एमाले सत्ता बाहिर बस्नु परेका कारण छटपटाएको टिप्पणी गरेका छन् ।
पार्टीको युवा विशेष महाशाखाको बैठकलाई आइतवार मुख्यालय कोटेश्वर पेरिसडाँडामा सम्बोधन गर्दै पुनले लगातार तीन वर्ष सत्ता बाहिर बस्नुपर्दा एमाले छटपटिएको बताए ।
००००
नेपाली कांग्रेसका नेता डा शेखर कोइरालाले संसद गतिरोध लम्बिनुमा सरकार र प्रतिपक्ष दुवै दोषी रहेको बताएका छन्  । उनले संसद् तत्काल सुचारु गराउनका लागि संयोजनकारी भूमिका निर्वाह गर्न सरकारसँग आग्रह गरे । 

प्रतिनिधिसभा बैठक अवरुद्ध भएपछि आइतवार संसद् भवन परिसरमा पत्रकारहरूसँग कुरा गर्दै कोइरालाले प्रतिपक्षलाइ आरोप लगाएर मात्र सरकार उम्किन नमिल्ने बताएका हुन् ।

यसैगरी उपप्रधान एवं गृहमन्त्री नारायणकाजी श्रेष्ठले विमानस्थल भन्सार बाहिरबाट समातिएको झन्डै ६१ किलो सुन सम्बन्धमा नेपाल प्रहरीको केन्द्रीय अनुसन्धान ब्यूरो (सीआईबी)ले नै निष्कर्षमा र्पुयाउने बताएका छन् ।

००००
संसदीय सुनुवाइ समितिले प्रस्तावित प्रधानन्यायाधीश विश्वम्भरप्रसाद श्रेष्ठको सोमबार संसदीय सुनुवाइ गर्ने भएको छ । 
समितिको आइतबारको बैठकले प्रधानन्यायाधीश पदमा नियुक्तिका लागि सवैधानिक परिषद्बाट सिफारिस भई आएकोमा उनको सोमबार संसदीय सुनुवाइ गर्ने निर्णय गरेको हो ।
००००
बलात्कारको आरोपमा मध्यपुरथिमि नगरपालिका–२ सानोठिमीस्थित बाल सुधार गृहको थुनामा रहेका एक युवकको रहस्यमय ढङ्गले मृत्यु भएपछि गृहमा तोडफोड भएको छ ।
रामेछापको मन्थली नगरपालिका–३, कठजोरका २१ वर्षीय कमल बस्नेतको आज बिहान रहस्यमय ढङ्गले मृत्यु भएको भन्दै निजका आफन्तले बाल सुधार गृह अगाडि नाराबाजी गरी तोडफोड गरेपछि दिनभर तनाव ग्रस्त भएको हो ।
००००
चोरिएका दुई बच्चासहित बारा जिल्लाको देवताल गाउँपालिका ३ अमुवाबाट एक व्यक्तिलाई सशस्त्र प्रहरीले नियन्त्रणमा लिएको छ । 
बच्चाहरूलाई बोरामा राखेर भारततर्फ लैजाँदै गरेको अवस्थामा बीओपी दक्षिणझिट्कैयाले भारतको पूर्वीचम्पारण मुर्तिया ग्रामपन्चायत ४ आधारपुर घर भएका २२ वर्षीय ताबरेज आलमलाई नियन्त्रणमा लिएको हो ।
००००
नेपाल कम्युनिष्ट पार्टी माओवादी केन्द्र गण्डकी प्रदेश समितिले पार्टीले सञ्चालन गर्ने ‘जनतासँग माओवादी विशेष रुपान्तरण अभियान’ का लागि नेताहरुको जिम्मेवारी तोकेको छ । पोखरामा यही भदौ २ गते बसेको प्रदेश समितिको सातौँ पूर्ण बैठकले अभियानको कार्ययोजना तथा जिम्मेवारी निश्चित गरेको हो ।
००००
वाणिज्य बैंकहरूले ब्याजदर बढाउँदाको असर नेप्सेमा देखिएको छ । बैंकहरूले भदौ १ (शुक्रवार)देखि ब्याजदर बढाएका छन् ।
बैंकहरूले बढाएको ब्याजदरको प्रभाव स्वरूप आइतवारको शेयर बजार राताम्मे हुन पुगेको छ । आइतवार नेप्से सूचक २१.९९ अंकले घटेको छ । एकैदिन १.०८ प्रतिशतले घटेर नेप्से सूचक २०११.१४ विन्दुमा झरेको छ । 
००००
स्पेनले पहिलोपटक महिला विश्वकप फुटबलको उपाधि जितेको छ । अष्ट्रेलियामा आइतबार सम्पन्न फाइनलमा इंग्ल्यान्डलाई १–० गोल अन्तरले हराउँदै स्पेनले विश्वकपको पहिलो उपाधि जितेको हो ।