२५ जेठ २०८३, सोमबार
जनता समाजवादी पार्टी (जसपा)का अध्यक्ष उपेन्द्र यादवको फेसबूक पेज ह्याक भएको आशंका गरिएको छ ।
अंग्रेजी र नेपाली दुवै भाषामा उपेन्द्र यादवको नाम लेखिएको फेसबूक पेजको स्टोरीमा अश्लील तस्वीर तथा भिडियो राखिएको छ ।
जसपाका अध्यक्ष उपेन्द्र यादव भारत भ्रमणमा रहेका बेला उनको पेजमा अश्लील तस्वीरहरू राखिएपछि पेज ह्याक भएको हुनसक्ने जसपाका प्रवक्ता मनिष सुमनले आशंका गरेका छन् ।
‘उक्त पेज उहाँको एक सहयोगीले चलाइरहेको थियो । तर ती सहयोगीको पनि मोबाइल अफ छ,’ सुमनले लोकान्तरसँग भने, ‘सायद त्यो पेज ह्याक भएको हुनसक्छ ।’
उपेन्द्रका छोरा अमरेन्द्र यादवले पनि उक्त पेज ह्याक भएको अनुमान गरेका छन् । सामाजिक संजाल फेसबूकमा उनले लेखेका छन्, ‘जसपा नेपालका राष्ट्रिय अध्यक्ष माननीय उपेन्द्र यादवज्यूको अधिकारिक फेसबूक पेज ब्लु टिक लागेको पेजमात्र हो अरू सबै फेक आइडी र पेज रहेछ । त्यसमध्ये विनाब्लु टिक भएको पेज कुनै समर्थकले चलाइरहेको थियो । सायद जुन ह्याक भएको जस्तो लाग्दैछ । यो पेज ह्याक गरेर अश्लील भिडियोहरू स्टोरीमा अपलोड भएको देखिँदै छ ।’
