३१ असार २०८३, बुधबार
नेपाल प्रहरीको कोशी प्रदेश प्रहरी गण रानीमामा कार्यरत वरिष्ठ सई लक्ष्मण महतराले चोरीको मोटरसाइकल प्रयोग गर्ने गरेको उजुरी परेपछि प्रहरीले छानबिन थालेको छ ।
उनले चोरीको मोटरसाइकलमा प्रदेश नं. १–०१–०१३ प ७०२२ नम्बर राखेर कुदाउने गरेको भन्दै साउन २१ गते प्रहरी प्रधान कार्यालय बेनामे उजुरी दर्ता भएको थियो । महतराविरुद्ध उजुरी परेपछि छानबिनको लागि प्रहरी प्रधान कार्यालयले कोशी प्रदेश प्रहरी कार्यालय विराटनगरमा पत्र पठाएको थियो ।
केन्द्रको पत्र आएपछि प्रदेश प्रहरीले छानबिन थालेको हो । उजुरीउपर छानबिन भइरहेको प्रदेश प्रहरी कार्यालय विराटनगरका प्रवक्ता एसपी ऋषिराम कँडेलले जानकारी दिए ।
सई महतरा यसअघि इलाका प्रहरी रानी, विराटनगरमा लेखापालको रूपमा कार्यरत थिए । उनी सरुवा भएर प्रदेश प्रहरी गणमा पुगेका हुन् ।
इप्रका रानीमा हुँदादेखि उनी चोरीको मोटरसाइकल प्रयोग गर्दै आएको उजुरीमा उल्लेख छ । उजुरीमा उनले तस्करसँग मिलेमतो गरेर पैसा लिने गरेको समेत आरोप लगाइएको छ ।
