कांग्रेस महामन्त्री गगन थापाले संविधानसभाका अध्यक्ष सुवास नेम्वाङको दृढताको कारण दोस्रोपटकको प्रयासमा संविधान प्राप्त गर्न सकेको बताएका छन् । पोखरा महानगरपालिकाको सम्मेलनमा बोल्दै महामन्त्री थापाले बाह्य दबाबकाबीच सरल, संघर्षशील र सहयात्री नेम्वाङकै कारण संविधान आउन सफल भएको बताएका हुन् । 

‘सुवास नेम्वाङ, सरल, संघर्षशील र सहयात्री गुमाउँदा सहयात्री स्तब्ध भयौं । गिरिजाप्रसादलाई सभामुखको यस्तो पात्र चाहिएको थियो कि जोस र होस दुवै होस् । यस्तो पात्रको खोजी हुँदा उहाँले नेम्वाङलाई ठहर्याउनुभयो । पछि यो कुरा प्रमाणित पनि भयो । किनकि संविधान निर्माणमा उहाँको भूमिका समन्वयकारी थियो ।’ 

पहिलो संविधानसभा भंग हुन नदिन नेम्वाङले लचक, निर्णायक र हस्तक्षेपकारी बन्न आफूहरूले पटकपटक आग्रह गरेको पनि थापाको भनाइ थियो ।

संविधानसभा भंग हुने बेलामा अध्यक्षलाई लचक, निर्णायक र हस्तक्षेपकारी हुनुहुनुपर्छ भन्ने हाम्रो मत थियो । हामीले उहाँसँग गुनासो पनि गरेका छौं,’ उनले भने, ‘दोस्रोपटक कृष्णप्रसाद सिटौला मस्यौदा समितिको सभापति हुनुहुन्थ्यो । संविधान घोषणमा द्धिविधा र अलमल थिए । घोपणा नगर पर सार भनेर खासगरी बाह्य दबाब थिए । तर नेम्वाङको भूमिका निर्णायक रह्यो । सच्याउनुपर्ने भए सच्याउँला, सुुधार गर्नुपर्ने ठाउँमा सुधार गरौंला भनेर टुंगोमा पुर्याउन नेम्वाङको दृढता थियो । जसले गर्दा संविधान प्राप्त गर्न सक्यौ ।’

एउटा राजनीतिककर्मीको नजरमा आरोप अवरोह आउने भए पनि बाह्य दबाबकाबीच संधिधान ल्याउन भूमिका खेल्ने नेताको रुपमा नेम्वाङ सधैं स्मरणीय रहिरहने महामन्त्री थापाले बताए ।