२२ असार २०८३, सोमबार
काठमाडौँको गैह्रीगाउँमा चार जनाको हत्या भएको छ । धारिलो हतियार ‘खुकुरी’ प्रहार गरेर हत्या गरेको अवस्थामा गएराति चार जनाको शव भेटिएको काठमाडौं प्रहरी परिसरका एसपी कुमोद ढुंगेलले लोकान्तरलाई जानकारी दिए ।
गैह्रीगाउँस्थित दिव्य सः मिलभित्र ४ जनाको शव फेला परेको उनले बताए । 'गैह्रीगाउँमा चार जना मृत फेला परेका छन् । धारिलो हतियार प्रहार गरेको देखिन्छ,'लोकान्तरसँग उनले भने ।
उनका अनुसार मृत्यु हुनेमा २ महिला र दुई जना पुरुष छन् । हत्या हुनेमा दोलखा घर भएका ३ र १ जना धनकुटाका छन् । गएराति १२ बजेतिर घटना भएको प्रारम्भिक जानकारी आएको उनले बताए । घटनाको कारण खुलिसकेको छैन ।
यसबारे थप अनुसन्धान भइरहेको प्रहरीको भनाइ छ ।
केही दिनअघि कांग्रेस सहमहामन्त्री महेन्द्र यादवमाथि काठमाडौंको भृकुटीमण्डपमा दिउँसै खुकुरी प्रहार भएको थियो । रिपोर्टर्स् क्लबको कार्यक्रमबाट बाहिरिएका यादव गाडी चढ्न लाग्दा आक्रमण भएको थियो ।
