२१ जेठ २०८३, बिहीबार
प्रधानमन्त्री पुष्पकमल दाहाल प्रचण्डले चीनले जारी गरेको नयाँ नक्सामा नेपालको 'चुच्चे नक्सा' नसमेटिएको बारे भ्रमणमा चर्चा भएको दाबी गरेका छन् । नक्साबारे पहिले नै कुरा भएको र आगामी दिनमा सकारात्मक ढंगले कुरा हुने उनले बताए ।
एकसाता लामो चीन भ्रमण सकेर स्वदेश फर्किएपछि शनिवार विमानस्थलमा पत्रकारले सोधेको एक प्रश्नमा प्रचण्डले नक्साबारे पहिल्यै कुरा भएको बताएका हुन् । ‘नक्साबारे पहिले नै हामीले कुरा गरेको थियौँ, समग्रमा चर्चा भएको छ, यो विषयमा आउने दिनमा अझ सकारात्मक ढंगले जानेछ’ प्रचण्डले भने ।
पहिल्यै कुरा भएको भनेर प्रधानमन्त्री प्रचण्डले दाबी गरे पनि चीनसँग औपचारिक कुराकानी भएको बाहिर आएको थिएन । बरु माओवादीकै नेताहरूले प्रचण्डको भ्रमणका क्रममा नक्साबारे कुरा हुने बताएका थिए ।
चार वर्षअघि नेपालले लिपुलेक र कालापानी क्षेत्रलाई समेटेर जारी गरेको नक्सालाई मान्यता नदिई नेपालको पुरानै नक्सा देखाएर चीनले नयाँ नक्सा जारी गरेको थियो । प्रचण्डको चीन भ्रमणअघि संसदको अन्तराष्ट्रिय सम्बन्ध समितिमा यसबारे कुरा उठेको थियो ।
संयुक्त राष्टसंघको महासभामा सहभागी हुन भदौ ३० गते अमेरिकाको न्युयोर्क प्रस्थान गरेका प्रधानमन्त्री अमेरिकाबाट सिधै चीन प्रस्थान गरेका थिए । चीनमा उनले राष्टपति सी चिनफिङ, समकक्षी ली छ्याङ लगायतसँग भेटवार्ता गरेका थिए ।
