०६ साउन २०८३, बुधबार
एमाले सचिव नेकपा (एमाले) सचिव पद्मा अर्यालले जाजरकोट र रुकुम पश्चिममा गएको भूकम्पमा परी घाइते भएर उपचारत बिरामीहरूलाई भेट गरेकी छिन् ।
शनिवार बाँकेका अस्पतालमा उपचारतहरूलाई भेटेर उनले पीडित र घाइतेलाई आवश्यक सहयोगमा जुट्न आग्रह गरिन् ।
बिरामीका लागि रगत अभावको सूचना पाएपछि अभाव हुन नदिन एमालेको भ्रातृ संगठन युवासंघ र अनेरास्ववियु बाँके जिल्लाले तुरुन्तै रक्तदानको काम शुरू गरेको पूर्वमन्त्रीसमेत रहेकी अर्यालले जानकारी दिइन् ।
आवश्यक प्रबन्धका लागि अस्पतालसँग समन्वय गरी सहयोग गर्ने काम एमाले जिल्ला कमिटी, बाँकेले गर्ने उनले बताइन् । आइतवार घटनास्थलमा राहत सामग्री लिएर जाने तयारीमासमेत आफू रहेको उनले जानकारी दिइन् ।
जाजरकोटको रामीडाँडालाई केन्द्रबिन्दु बनाएर शुक्रवार राति ६.४ म्याग्निच्युटको भूकम्प गएको थियो । अहिलेसम्म १३८ जनाको निधन भइसकेको छ भने कम्तीमा १६६ घाइते भएका छन् ।
