३० असार २०८३, मंगलबार
भारतबाट तस्करीमार्फत सुनचाँदीको गरगहना ल्याएर बिक्री गर्ने विराटनगरका सुनचाँदी व्यवसायी ६० लाख धरौटी रकम बुझाएर थुनामुक्त भएका छन् ।
भरियामार्फत सुनचाँदीको गरगहना नेपाल ल्याएर बिक्री गरेको आरोपमा उनलाई विराटनगर भन्सार कार्यालयबाट खटिएको टोलीले पक्राउ गरेको थियो ।
विराटनगर भन्सार कार्यालयका प्रमुख ज्ञानेन्द्रराज ढकालका अनुसार विराटनगर–११ पिचरास्थित पशुपति ज्वेलर्सका सञ्चालक विश्वजीत जाना ६० लाख ५० हजार ७५० रुपैयाँ धरौटी बुझाएर थुनामुक्त भएका हुन् ।
गत कात्तिक २१ गते जानाले सञ्चालन गरेको पशुपति ज्वेलर्सबाट सरकारी टोलीले अवैध एक क्विन्टल चाँदीका गरगहना र १३ तोला सुन बरामद गरेको थियो ।
उनीविरुद्ध सुनचाँदीको अवैध कारोबार गरेको अभियोगमा मुद्दा चलाइएको थियो । उनीविरुद्धको मुद्दाको फैसला भने हुन बाँकी छ ।
जानाले भारतबाट भन्सार छलेर तयारी गहना नेपाल ल्याउँदै आफ्नो ज्वेलर्समा राख्ने र विराटनगरसहित पूर्वका विभिन्न सुनचाँदी पसलमा बेच्ने गरेको प्रारम्भिक अनुसन्धानबाट खुलेको छ ।
बरामद भएको चाँदी र सुनको परिमाण यकिन गर्न राष्ट्र बैंकको टक्सारा विभागमा पठाइएको विराटनगर भन्सार कार्यालयले जनाएको छ ।
रसायनसहित तौल लिँदा चाँदीका सामग्री एवं गहना ९९.९४६ किलोग्राम तथा सुनका गहना १५३.८ ग्राम रहेको पुष्टि भएको थियो ।
काँचो चाँदी ७ सय ६० ग्राम पनि फेला भन्सार कार्यालयले जनाएको छ ।
