२४ जेठ २०८३, आइतबार
प्रधानमन्त्री पुष्पकमल दाहाल ‘प्रचण्ड’ले संघीय लोकतान्त्रिक गणतन्त्र उल्टाउने सपना नदेख्न राजसंस्था पक्षधरहरूलाई चेतावनी दिएका छन् ।
मन्त्रिपरिषद्ले सरकारी लिखतहरूमा नेपाल संवत्समेत उल्लेख गर्ने निर्णयको स्वागतमा आफूलाई सम्मान गर्ने कार्यक्रमलाई बुधवार काठमाडौंमा सम्बोधन गर्दै उनले यस्तो चेतावनी दिएका हुन् ।
सो अवसरमा प्रधानमन्त्री प्रचण्डले संघीय लोकतान्त्रिक गणतन्त्र उल्टाउन चाहने प्रतिगामीहरूको सपना कहिल्यै पूरा नहुने ठोकुवासमेत गरे ।
‘संसारकै नियम हो– पराजित भइसकेका सामन्ती तत्वहरूले अन्तिमपटक टाउको उठाउन खोज्छन् । अहिले पनि त्यही कोसिस हुँदैछ,’ उनले भने, ‘संघीय लोकतान्त्रिक गणतन्त्र उल्टाउने सपना कसैले नदेख्दा हुन्छ । यस्तो दुष्प्रयास गर्नेहरूले फेरि अर्को मूल्य चुकाउनु पर्नेछ ।’
अर्को प्रशंगमा प्रधानमन्त्री प्रचण्डले नेपाल संवत् नेपालको मौलिक संवत् भएको बताए ।
‘हामीले विक्रम संवत् प्रयोग गरिरहेका छौं । कतिपय सन्दर्भमा अंग्रेजी संवत् पनि लेखिन्छ । तर, नेपाल संवत् नेपालको आफ्नै मौलिक संवत् हो । यसलाई राष्ट्रिय संवत्को रूपमा विकसित तुल्याउनु पर्दछ ।’
कार्यक्रममा राजनीतिक दल र नागरिक समाजका अगुवाहरूले संघीय लोकतान्त्रिक गणतन्त्रको रक्षाका निम्ति जस्तोसुकै मूल्य चुकाउन तयार रहेको बताएका थिए ।
मेडिकल व्यवसायी दुर्गा प्रसाईंले बिहीवार काठमाडौंमा गणतन्त्रविरुद्ध प्रदर्शन गर्दैछन् । प्रधाननमन्त्रीलगायत राजनीतिक दल र नागरिक समाजका अगुवाको चेतावनी यसैप्रति लक्षित देखिन्छ ।
