सर्लाहीमा दुईवटा मोटरसाइकल आपसमा ठोक्किँदा एक जनाको मृत्यु भएको छ । पूर्वपश्चिम राजमार्गस्थत बागमती नगरपालिका-४ पुरानो चौकीमा शनिबार साँझ दुइटा मोटरसाइकल ठोक्किँदा उछिट्टिएर खसेका एक जनाको बसले किचेर मृत्यु भएको प्रहरीले जनाएको छ । 

मृत्यु हुनेमा अन्दाजी ३५ वर्षीय सुनिल लामा रहेको जिल्ला प्रहरी कार्यालय सर्लाहीका प्रवक्ता डीएसपी दिपेन्द्र सिंह पञ्जियार थारूले लोकान्तरलाई जानकारी दिए । उनको घटनास्थलमै मृत्यु भएको हो । 

उनका अनुसार प्र २ ०३ ००६ प ६७ नम्बरको मोटरसाइकल र बा २ ब ५७६६ नम्बरको मोटरसाइकल ठोक्किएका थिए । दुइटा मोटरसाइकल ठोक्किँदा उछिट्टिएर खसेका​ लामालाई मलंगवाबाट काठमाडौंतर्फ जाँदै गरेको ना ७ ख १८३६ नम्बरको बसले किचेको थियो ।

दुर्घटनापछि बस चालकलाई नियन्त्रणमा लिइएको उनले बताए ।