२४ जेठ २०८३, आइतबार
सत्तारुढ दल नेपाली कांग्रेसको केन्द्रीय कार्यसम्पादन समितिको बैठक आज बस्दैछ । राष्ट्रियसभा सदस्य निर्वाचनका विषयमा छलफल गर्न कांग्रेसले कार्यसम्पादन समिति बैठक बोलाएको हो । बैठक दिउँसो १ बजे केन्द्रीय कार्यालय, सानेपामा बस्नेछ ।
पार्टीका मुख्यसचिव कृष्णप्रसाद पौडेलले मुलुकको समसामयिक राजनीतिक घटनाक्रम र राष्ट्रियसभा सदस्यको निर्वाचनमा उम्मेदवार कसलाई बनाउने भन्नेबारे छलफल गर्न बैठक आह्वान गरिएको बताए ।
कांग्रेसले केन्द्रीय कार्यसम्पादन समितिको बैठकमा उपस्थित हुन पार्टी पदाधिकारी एवं सदस्यलाई अनुरोध पनि गरेको छ ।
कांग्रेसमा केन्द्रीय समितिको बैठक नियमित बस्न नसकेका बेला महत्वपूर्ण निर्णय गर्न पदाधिकारी र वरिष्ठ केन्द्रीय सदस्य रहने कार्यसम्पादन समितिको बैठक बस्ने गर्छ ।
बैठक शनिवारका लागि तय भएको थियो । तर, सत्ता गठबन्धनबीच शनिवार सिट बाँडफाँटमा सहमति हुन नसकेपछि बैठक आज बस्न लागेको हो ।
माघ ११ गते हुने राष्ट्रियसभा निर्वाचनका लागि पुस २३ गते (सोमवार) उम्मेदवारी दर्ताको कार्य तालिका छ । त्यसैले कांग्रेस आफ्नोतर्फबाट उम्मेदवार टुंगो लगाउन जुटेको हो ।
अर्कोतिर कांग्रेससहितको सत्ता गठबन्धनमा आबद्ध दलहरूले पनि बैठक राखेर आजै उम्मेदवारमा सहमति जुटाउने बताएका छन् । शनिवारकाे बैठक निष्कर्षविहीन टुंगिएको थियो ।
राष्ट्रियसभामा सर्वसहमतिको दौडबाट प्रतिपक्षी नेकपा (एमाले) भने बाहिरिएको छ ।
