राष्ट्रियसभाको १० सिटमा भागबण्डा मिलाउन नेपाली कांग्रेस संसदीय बोर्डको बैठक आइतबार मध्यरातसम्म बसेको छ । यद्यपि राति ११ बजे यो समाचार तया पार्दासम्म नेता कृष्ण सिटौलाको बाहेक अरुको टिकट टुंगो लागेको छैन । 

सिटौला भने पार्टी सभापति शेरबहादुर देउवाद्वारा हस्ताक्षरित टिकट बोकेर आइतबार साँझ नै स्थलमार्गबाट विराटनगरतर्फ प्रस्थान गरेका छन् । उनले राष्ट्रियसभामा कोशी प्रदेशाट सोमबार मनोनयन दर्ता गराउने कार्यक्रम छ । 

कांग्रेसभित्र संस्थापन र इतर पक्षबीच सिट संख्यामा विवाद छ भने दुबै पक्षमा को उम्मेदवार बन्ने भन्नेमा पनि उस्तै विवाद छ । विवादका विषयमा समझदारी गर्दै सहमति जुटाउने प्रयास जारी रहेको नेताहरुको भनाइ छ । 

अहिले भागबण्डामा असन्तुष्ट बन्दै पार्टी कार्यालय सानेपास्थित बैठकस्थलबाट बाहिरिएका कांग्रेस नेता शेखर कोइराला फेरि फर्किएका छन् ।  सहमहामन्त्री डीना उपाध्याय र त्यसपछि नेता रमेश लेखकले समेत फोन गरेसँगै उनी फर्किएका हुन् । 

कोइराला पक्षले ४ सिट मागेको तर संस्थापन पक्षले ४ सिट दिन नसकिने बताएपछि जंगिँदै कोइराला बैठक स्थलबाट बाहिरिएका थिए। फेरि कोइराला फर्किएसँगै नेताहरु छुट्टाछुट्टै छलफलमा छन् । आन्तरिक छलफलपछि बोर्डको बैठक बसेर ठोस निर्णय गर्ने कांग्रेसको तयारी छ । 

कांग्रेस नेता अर्जुन नरसिंह केसीले सहमति जुटाउन प्रयास जारी रहेको बताए । उनले अझै पनि बोर्डको बैठक बस्न नसकेको भन्दै बैठकले केन्द्रीय समिति बैठकको मर्मअनुसार निर्णय गर्नुपर्ने बताए । केन्द्रीय समितिले अवसर नपाएका र नयाँ अनुहारलाई समेट्ने निर्णय गरेको थियो ।