०४ साउन २०८३, सोमबार
काठमाडौंको बिजुलीबजारस्थित चक्रवर्ती एजुकेसन एकेडेमीका सञ्चालक आफ्नै छोरासहितकाे समूहबाट कुटिएका छन् ।
कानून पढाई हुने निजी क्षेत्रको उक्तका कलेजका अध्यक्ष देवेन्द्र भण्डारी आफ्नै छोरा निरज भण्डारीसहितको समूहबाट कुटिएको काठमाडौं प्रहरी परिसरका प्रवक्ता एसपी कुमोद ढुंगेलले जानकारी दिए ।
टाउकोमा चोट लागेका भण्डारीको नर्भिक अस्पतालमा उपचार भइरहेको छ । अस्पताल स्रोतका अनुसार उनी बोल्न नसक्ने अवस्थामा छन् ।
छोरा निरजसहितको समूहले अध्यक्ष भण्डारीलाई कलेज प्रवेशमै रोक लगाएको थियो । सोही विषयलाई लिएर झगडा भएको हो । ६८ वर्षका देवेन्द्रको टाउकोमा चोट लागेको प्रहरीले जनाएको छ ।
उनलाई सिभिल अस्पतालबाट नर्भिक अस्पताल रिफर गरिएको छ । घटनामा संलग्न रहेको आरोपमा २४ जनालाई नियन्त्रणमा लिएर अनुसन्धान शुरू भएको प्रहरीले जनाएको छ ।
पक्राउ पर्नेमा धनगढी उपमहानगरपालिका घर भएका २७ वर्षीय धिर्खबहादुर रोकाया, काठमाडौंको चक्रपथ घर भएका २५ वर्षीय अभिनक सिंह राठोर र इटहरी उपमहानगरपालिका घर भएका क्षितिज कोइराला छन् ।
यस्तै खोटाङ तोलचुनका अमरबहादुर बिक, उदयपुर कटारीका जीवन भुजेल, ललितपुर गोदावरीका केशव देशार, सल्यान बागचौरका रिजन केसी र मकवानपुर हेटौंडाका भीमलाल वाइबा पनि पक्राउ परेका छन् ।
घटनामा संलग्नताको आरोपमा प्रहरीले मकवानपुरका २७ वर्षीय मनिष थिङ, ललितपुरका रजित व्यञ्जनकार र सञ्जय महर्जन तथा काभ्रेका भीमबहादुर तामाङलगायतलाई पक्राउ गरिएको प्रहरीले जनाएको छ ।
