नेपाल समाजवादी पार्टी (नेसपा)ले जनआकांक्षा सम्बोधन गर्न प्रत्यक्ष निर्वाचित कार्यकारी र पूर्ण समानुपातिक निर्वाचन प्रणालीका लागि संविधान संशोधन गर्न माग गरेको छ । 

केन्द्रीय समितिको पाँचौं पूर्ण बैठकबाट समसामयिक प्रस्ताव पारित गर्दै नेसपाले प्रत्यक्ष निर्वाचित कार्यकारी र पूर्ण समानुपातिक निर्वाचन प्रणालीका लागि संविधान संशोधन गर्नुपर्ने प्रस्ताव गरेको हो । 

‘संविधानले संस्थागत गरेका राजनीतिक उपलब्धिहरूलाई उल्ट्याउने प्रतिगामी हर्कतप्रति सचेत रहँदै राष्ट्रको समृद्धि, जनआकांक्षाहरूको परिपूर्ति र राजनीतिक स्थिरताका निम्ति प्रत्यक्ष निर्वाचित कार्यकारी र पूर्ण समानुपातिक निर्वाचन प्रणालीको औचित्य पुष्टि भएको हुँदा संविधान संशोधनका निम्ति यो बैठक माग गर्दछ’, नेसपाले भनेको छ, ‘साथै प्रतिगामी, पुनरुत्थानवादी तथा दक्षिणपन्थीहरूबाट लोकतान्त्रिक गणतन्त्र, सङ्घीयता, धर्मनिरपेक्षता, संविधान र जनताको सार्वभौमिकतामा प्रहार हुनसक्ने स्थितिप्रति सजग रहँदै यो बैठक सम्पूर्ण प्रगतिशील लोकतान्त्रिक समाजवादी शक्तिलाई एकजुट हुन आह्वान गर्दछ।’​

पुराना शक्तिहरूको विकल्पमा प्रगतिशील, लोकतान्त्रिक, समाजवादी शक्तिहरूको वृहत् ध्रुवीकरणसहित नयाँ समाजवादी शक्ति निर्माण गर्न एकताबद्ध हुन पनि नेसपाले आग्रह गरेको छ ।

राज्यका सबै अङ्गमा भ्रष्टाचार र कमिसन तन्त्र मौलाएकोले उचित छानबिन गर्न, अर्थतन्त्र सुधारको दिशामा लान पनि नेसपाले माग गरेको छ ।