नेकपा एमाले राष्ट्रिय सभा संसदीय दलका नेता देवेन्द्र दाहालले वर्तमान गठबन्धन समयको माग भएको बताएका छन् ।

राष्ट्रिय सभा अध्यक्षमा नारायणप्रसाद दाहाललाई समर्थन गर्दै दाहालले समयको आवश्यकताअनुसार नयाँ गठबन्धन बनेको बताएका हुन् ।

नयाँ गठबन्धनलाई सफल पार्नु आफूहरूको दायित्व भएको समेत उनले बताए ।

'यो समयको माग हो । आवश्यकता हो । हिजो नेकपा एमालेलाई एक्लै कर्नरमा पारेर गठबन्धन गरौं भन्ने अभ्यास साथीहरूले गर्नुभयो,' दाहालले भने, 'अहिले नयाँ ढंगले जाऊँ भनेर नेकपा एमालेसहितको गठबन्धन बनेको छ । अहिले यसलाई सफल पार्नु हाम्रो दायित्व हो ।'

उनले होशमा आउन कांग्रेसलाई सुझाव दिए । 'नेपाली कांग्रेसकै एक नेताको भनाइ सापटी लिन चाहन्छु, कांग्रेस होशमा आउनुपर्छ भन्नुभाछ,' दाहालले भने ।