०७ साउन २०८३, बिहीबार
ईपीजी नामक संस्थाले प्रदान गरेको ‘पोलिटिकल एन्ड पब्लिक लाइफ अवार्डस २०२४’ अन्तर्गत ‘इन्टरनेशनल मेयर अवार्ड’ ग्रहण गर्न बेलायत आएकी भरतपुर महानगरपालिकाकी मेयर रेनु दाहाल बेल्जियम आइपुगेकी छिन् ।
एनआरएनए बेल्जियमले एक कार्यक्रमको आयोजना गरेर मेयर दाहाललाई स्वागत गरेको छ ।
स्वागतका क्रममा एनआरएनए बेल्जियमका अध्यक्ष सीता सापकोटाले विचार र आस्थाको दृष्टिले मतभेद भए पनि भरतपुरको विकासको बारेमा कसैले पनि प्रश्न उठाउन नसक्ने बताइन् ।
स्वागत कार्यक्रममा बोल्दै मेयर दाहालले आफू सफल हुनुमा सम्पूर्ण नेपालीहरूको ठूलो साथ, सहयोग रहेको बताइन् । उनले एनआरएनए बेल्जियमलाई भरतपुर भ्रमण वर्षको औपचारिक निम्तो पत्र पनि हस्तान्तरण गरेकी थिइन् ।
दाहालले एक वर्षमा कम्तीमा तीन लाख पर्यटक महानगरका पर्यटकीय क्षेत्रमा घुम्न आउने वातावरण बनाउने गरी तयारी भएको बताएकी छिन् ।
देश आर्थिक रूपमा सबल नभए पनि भ्रमण वर्षको कारण आर्थिक गतिविधि चलायमान गराउन सफल हुने उनको दाबी थियो ।
मेयर दाहालको आगामी कार्यक्रम स्पेनमा छ। उनले स्पेनमा रहँदा त्यहाँका मेयरहरूसंग भेटघाट गरी भरतपुर भ्रमण वर्षको विषयमा जानकारी गराउने योजना बनाएकी छिन् ।
