‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
कोशी प्रदेश सरकारका तीन जना मन्त्रीले सोमबार सामूहिक राजीनामा दिएका छन् ।

खानेपानी, सिँचाइ तथा ऊर्जामन्त्री नारायणबहादुर मगर, सामाजिक विकासमन्त्री राजेन्द्र कार्की र पर्यटन, वन तथा वातावरणमन्त्री गणेशप्रसाद उप्रेतीले पदबाट राजीनामा दिएको मुख्यमन्त्रीका सञ्चार सल्लाहकार देवनारायण साहले जानकारी दिए । उनीहरु माओवादी केन्द्रका मन्त्री हुन् । 

कोशीमा माओवादी केन्द्र र एमालेले सरकारलाई दिएको समर्थन फिर्ता लिएर नयाँ सरकार गठनको प्रयास गरेका छन् । तर, मुख्यमन्त्री केदार कार्कीले मार्गप्रशस्त गरेका छैनन् । कोशीको तरल राजनीतिका कारण मध्यावधिको खतरा समेत छ । 

यही बीचमा माओवादी र कांग्रेसले प्रदेश प्रमुखलाई भेटर विशेष अधिवेशन बोलाउन आग्रह गरेका छन् भने मुख्यमन्त्रीलेचाहिँ जेठमा नियमित अधिवेशन आह्वान गर्न सिफारिस गरेका छन् । 

सोमबार नै एमाले–माओवादीले बहुमत सांसदको हस्ताक्षरसहित प्रदेश प्रमुखसमक्ष दाबी प्रस्तुत गरेका छन् । कोशीमा सरकार गठनका लागि ४७ सांसद चाहिन्छ ।

हिक्मत कार्कीलाई मुख्यमन्त्री बनाउन एमालेका ४० र माओवादीका १३ गरी ५३ सांसदले हस्ताक्षर गरेका छन् ।
००००
आगामी जेठमा अमेरिका र वेस्टइन्डिजमा आयोजना हुने आइसिसी टी–२० विश्वकप क्रिकेट प्रतियोगिताको लागि नेपाली राष्ट्रिय क्रिकेट टोलीले प्रयोग गर्ने नयाँ जर्सी सार्वजनिक भएको छ ।

नेपाल क्रिकेट सङ्घ (क्यान)द्वारा मंगलबार आयोजित पत्रकार सम्मेलनमा युवा तथा खेलकुदमन्त्री विराजभक्त श्रेष्ठ र राखेप सदस्य सचिव टङ्कलाल घिसिङले संयुक्तरुपमा नेपालको नयाँ जर्सी सार्वजनिक गरेका हुन् ।

नेपालको नयाँ जर्सीमा रातो, हल्का सेतो र नीलो रङ्ग मिश्रित गरिएको छ भने दुवै काँधमा नेपालको झण्डा अङ्कित रहेको छ ।
००००
उपप्रधान एवं गृहमन्त्री रवि लामिछानेले काठमाडौंको चन्द्रागिरिस्थित सशस्त्र प्रहरी (एपीएफ) को गोदाममा भएको आगलागीबारे जानकारी लिएका छन् । सोमवार साँझ एपीएपको सामान राख्ने (स्टोर रुममा) भएको आगलागीबारे उनले सतुङ्गलनै पुगेर जानकारी लिएका हुन् ।

स्थलगत अनुगमनका क्रममा विद्युत सर्ट भएर आगो लागेको प्रारम्भिक जानकारी प्राप्त भएको मन्त्री लामिछानेको सचिवालयले जानकारी दिएको छ ।
००००
नेपाली कांग्रेसका नेता प्रदीप पौडेलले नयाँ वर्ष २०८१ सालमा विधिको शासन स्थापनामा दलहरू लाग्नुपर्ने बताएका छन् । 

नयाँ वर्ष २०८१ सालको पूर्वसन्ध्यामा सोमबार काठमाडौं आयोजित ‘शुभकामना आदानप्रदान तथा चियापान’ कार्यक्रममा उनले निराशाले समस्या समाधान हुन नसक्ने भन्दै नयाँ वर्षमा नयाँ आशा र विधिको शासन स्थापनामा दलहरू लाग्नुपर्ने बताए ।
००००
नागरिक उन्मुक्ति पार्टी (नाउपा)की सुदूरपश्चिम प्रदेश सभा सदस्य इन्दिरा गिरी पदमुक्त भएकी छन् ।

नाउपा केन्द्रीय अध्यक्ष रन्जिता श्रेष्ठले समानुपातिक सांसद गिरीलाई फिर्ता बोलाएको सूचना प्रदेश सभामा दर्ता भएपछि प्रदेश सभा सचिवालयले सोमवार उनी पदमुक्त भएको जानकारी गराएको हो ।
००००
सहकारी ठगीको आरोप लागेका गृहमन्त्री रवि लामिछानेमाथि छानबिन गर्न प्रमुख प्रतिपक्षी दल नेपाली कांग्रेसले गरेको प्रस्ताव सत्तापक्षले अस्वीकार गरेको छ ।

सभामुख देवराज घिमिरेले सोमवार आयोजना गरेको चार दलका शीर्ष नेताको बैठकमा सत्तापक्षले संसदीय छानबिन समिति गठन गर्न नसकिने अडान राखेको हो ।

बैठकपछि एमाले संसदीय दलका मुख्य सचेतक महेश बर्तौलाले राजनीतिक पूर्वाग्रहका आधारमा गरिएको संसदीय छानबिनको मागमा आफूहरू सहमत हुन नसकेको बताए । यससँगै संसदको अवरोध खुलाउने प्रयास विफल बनेको छ । कांग्रेसले मंगलबार पनि संसद अवरुद्ध पार्ने तयारी गरेको छ । 
००००
भिसा सकिएर पनि नेपालमा अवैध रुपमा बसिरहेका १० जना बङ्गलादेशी नागरिकलाई प्रहरीले पक्राउ गरी आइतवार अध्यागमन विभागमा बुझाएको छ । 

विभिन्न मितिमा नेपाल प्रवेश गरी भिसा सकिए पनि गैरकानूनी रूपले बसोबास गर्नुका साथै शङ्कास्पद गतिविधिमा संलग्न रहेको सूचनाका आधारमा खोजतलास गर्दा १० जना बङ्गलादेशी नागरिक पक्राउ परेका थिए ।
००००
नेपाली बजारमा सुनको मूल्य सोमबार पनि वृद्धि भएको छ । नेपाल सुनचाँदी व्यवसायी महासङ्घका अनुसार सोमबार छापावाला सुन तोलामा रु छ सयले वृद्धि भएको हो । 

आइतवार प्रतितोला रु एक लाख ३५ हजार छ सयमा कारोबार भएको छापावाला सुन आजका लागि भने रु एक लाख ३६ हजार दुई सय कायम भएको छ ।